E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Banka e Shqipërisë ka blerë 272 milionë euro vetëm për 6-mujorin e parë

29 Shtator 2024, 09:40, Ekonomi CNA

Banka e Shqipërisë ka blerë 272 milionë euro vetëm

Banka e Shqipërisë ka blerë gati 272 milionë euro në tregun valutor vetëm në gjysmën e parë të këtij viti.

Sipas informacionit të publikuar nga Banka Qendrore, për 6-mujorin e parë janë blerë gjithsej 134.2 milionë euro në ankandet e planifikuara për nevojat e rezervës valutore, ndërsa edhe më shumë, 137.6 milionë euro, janë blerë me operacione të drejtpërdrejta, me qëllim për të shmangur forcimin e mëtejshëm të lekut në kursin e këmbimit valutor.

Banka e Shqipërisë i filloi këto operacione në muajin maj, të argumentuara kryesisht me objektivin e stabilitetit të çmimeve. Gjatë gjithë vitit 2024 inflacioni ka qëndruar poshtë objektivit prej 3%, ndërsa në muajin gusht zbriti në nivelin 2%, më i ulët në tri vitet e fundit.

Shumat e blera janë të konsiderueshme, veçanërisht po të kemi parasysh se blerjet direkte për të frenuar forcimin e lekut janë blerë vetëm në periudhën dymujore, maj-qershor 2024 (përkatësisht, 80.4 milionë euro në maj dhe 57.2 milionë euro në qershor). Është e qartë se në mungesë të këtyre ndërhyrjeve kursi i këmbimit euro-lekë do të kishte rënë në nivele edhe më të ulëta.

Ndërhyrjet e Bankës së Shqipërisë në treg për të mbajtur kursin e këmbimit të euros sipër nivelit të 100 lekëve kanë vijuar edhe gjatë muajit korrik, ndërsa janë ndërprerë vetëm më datë 2 gusht.

Pikërisht pas këtij momenti, kursi i këmbimit të euros rrëshqiti poshtë vlerës së 100 lekëve. Rënia ka vazhduar edhe përgjatë muajit shtator. Kursi i këmbimit euro-lekë, e mbylli javën e kaluar në nivelin 98.84 lekë, më i ulëti i të gjitha kohërave.

Banka e Shqipërisë ka blerë 272 milionë euro vetëm

Pavarësisht se kursi ka rënë poshtë nivelit të 100 lekëve, ashtu siç edhe pritej, Banka e Shqipërisë ka vlerësuar se luhatshmëria e kursit (në këtë rast rënia) nuk ka qenë shumë e fortë dhe shqetësuese. Për këtë arsye, Banka Qendrore ka vendosur se një ndërhyrje në kursin e këmbimit, për momentin, nuk është më e nevojshme.

Megjithatë, presionet nënçmuese mbi euron kanë vazhduar qartë edhe pas përfundimit të verës. Kjo dëshmon se prurjet e bollshme valutore tashmë nuk janë të lidhura vetëm me periudhën e pikut të sezonit veror.

Turizmi duket se është i shpërndarë edhe në muajt e tjerë të vitit, ndërsa edhe investimet e huaja në tregun e pasurive të paluajtshme vazhdojnë të rriten. Investimet e huaja direkte në pasuri të paluajtshme për 6-mujorin 2024 arritën vlerën e 181 milionë eurove, në rritje me 43% krahasuar me 6-mujorin 2023.

Gjatë vitit 2024, me objektiv rritjen e rezervës valutore, Banka e Shqipërisë synon të blejë përmes ankandeve shumën prej 250-330 milionë eurosh.

Vetëm për këtë qëllim në gjysmën e parë të vitit janë blerë 134 milionë euro, me një rritje prej 15% krahasuar me të njëjtën periudhë të një viti më parë; nëse shtojmë edhe blerjet direkte për të ndikuar kursin e këmbimit tashmë intervali i parashikuar i blerjeve për t’u blerë në tregun e brendshëm valutor është arritur qysh në gjysmën e parë të vitit.