A është e vërtetë që "Big Brother" ndiqet kaq shumë në të gjithë botën, si në Shqipëri?

15 Janar 2024, 11:54, Blog Ergys Mërtiri

A është e vërtetë që "Big Brother" ndiqet kaq

Foto ilustruese

A është e vërtetë që "Big Brother" ndiqet po kaq shumë në të gjithë botën, siç na thonë apologjetët e banalitetit?

Sipas të dhënave nga Britania e Madhe, gjatë vitit 2023 një film dokumentar mbi natyrën ka tërhequr trefishin e audiencës së premierës së "Big Brother"-it të rikthyer pas 5 vitesh mungesë.

Filmi dokumentar "Planet Earth" renditet i teti në 10 eventet me audiencën televizive më të madhe. Ai mblodhi rreth 7.4 milionë shikues para ekranit nga 2.5 milionë që pati premiera e "BB", e cila as që iu afrua 10-shes.

Që "Big Brother" është një produk televiziv i llojit më të keq, që ai shfaq banalitet në një nivel fyes për publikun e që ai është i dëmshëm për shoqërinë, kjo është dicka e mirëpranuar në një rreth të gjerë kritikësh kudo nëpër botë dhe nuk ia vlen ta diskutojmë.

E papranueshme është që disa cinikë nëpër media kërkojnë ta amnistojnë banalitetin duke thënë se produkte të tilla i kërkon tregu dhe nuk kemi përse shqetësohemi sepse kjo ndodh në të gjithë botën.

Sigurisht fenomene problematike ka në të gjithë botën, por kjo nuk është një arsye për të mos u shqetësuar dhe aq më pak për t'i pranuar problemet si të mirëseardhura.

Fundja në të gjithë botën, paralelisht me problemet ka dhe njerëz qe i kritikojnë. Kërkesa për të mos pranuar kritikën, në emër të normalizimit të fenomeneve të kohës është diçka edhe më banale se vetë produktet që ata mbrojnë dhe, për më tepër, është diçka që nuk ndodh në të gjithë botën.

Por përveç kësaj, duhet ta themi që nuk ka një vend të botës ku audienca shkon në nivele të tilla sa në Shqipëri.

Audienca e "BB" preku rreth 3-4 për qind të popullsisë britanike, ndërsa në Shqipëri u boshatisën rrugët duke u mbërthyer të gjithë para ekranit me burra e gra, të moshuar e fëmijë.

Sigurisht ky është lajm i keq për gjendjen kulturore të shoqërisë dhe kjo tregon keqedukimin e saj.

Audienca nuk është diçka natyrore që i perzgjedh produktet mbi bazë principesh primordiale të vendosura që me lindjen e njeriut.

Ajo është diçka që kultivohet dhe rendja e shqiptarëve për t'u ushqyer në pleh tregon se si janë kultivuar shijet, botëkuptimet, mendësitë e tyre. Kjo tregon vetem se sa e varfër është bota e tyre kulturore, për të cilen sigurisht është punuar vite me radhë.

Kur media, politika, shkolla, mjedisi social e gjithçka tjetër kultivojnë banalitet, shterpësi e injorancë, patjetër që kjo do reflektohet në mënyrë kaq dramatike në tregun mediatik, e më tej, kjo do të reflektohet në gjendjen e djerrinës kulturore ku ka ngecur shoqëria shqiptare.