Zgjidhet për herë të parë një grua/ Ja kush është kryetarja e re e degës së PD-së në Peqin

22 Mars 2026, 11:56, Aktualitet CNA

Zgjidhet për herë të parë një grua/ Ja kush

Në zgjedhjet e zhvilluara këtë fundjavë në degën e PD në Peqin, anëtarësia votoi për kryetarin e ri të degës, e cila do të udhëhiqet për herë të parë nga një grua.

Enkelejda Gripshi është kryetarja e re e degës së PD në Peqin e cila garoi me Armand Kurtin, dy kandidatura me role aktive si brenda strukturave të partisë, ashtu edhe në jetën publike lokale. Ajo bëhet gruaja e parë që merr këtë detyrë që prej themelimit të partisë në qytet.

Ky zhvillim shihet si një sinjal për hapje dhe rinovim brenda strukturave lokale, si dhe për rritjen e rolit të grave në politikë. Në një reagim në rrjetet sociale, Gripshti ka falenderuar anëtarët të cilët i besuan votën për zgjedhjen ne këtë detyrë.

“Faleminderim nga zemra për çdo anëtar dhe mbështetës që më besoi votën sot për detyrën e Kryetares së Partisë Demokratike në Peqin. Ky besim është një përgjegjësi e madhe për mua dhe një motivim për të punuar çdo ditë me përkushtim, ndershmëri dhe transparencë për të mirën e qytetit tonë dhe të gjithë demokratëve. Së bashku do të ndërtojmë një strukturë më të fortë, më të hapur dhe më pranë njerëzve. Ju jam mirënjohëse për mbështetjen dhe besimin tuaj — rrugëtimi ynë sapo ka filluar! Faleminderit nga zemra”, thuhet në reagimin e saj.

Procesi i votimit dhe numërimit është cilësuar i rregullt dhe transparent, ndërsa pjesëmarrja e anëtarëve tregon për një interes të shtuar në jetën politike lokale. /CNA