E fundit!

09:34 Aktualitet

Apel për kujdes nga temperaturat e larta/ Rrezik për të moshuarit dhe fëmijët

Temperaturat e larta që po përfshijnë vendin po rrisin rre...

VKM: Shtohen kompetencat e prefektit, do të drejtojë Këshillin e Sigurisë Publike

21 Shkurt 2024, 14:49, Aktualitet CNA

VKM: Shtohen kompetencat e prefektit, do të drejtojë Këshillin e

Këshilli i Ministrave ka miratuar disa ndryshime në ligjin për prefektin që parashikojnë t’i japin më shumë kompetenca rolit të tij.

Në një konferencë për mediat, ministri i Brendshëm, Taulant Balla, tha se po krijohen Këshillat Vendorë të Sigurisë Publike me synimin për rritjen e sigurisë në komunitet.

Ai deklaroi se këto këshillat do të drejtohen nga prefektët.

“Dua të ndaj me ju se po krijojmë edhe Këshillat Vendorë të Sigurisë Publike, për të koordinuar më së miri të gjitha agjencitë ligjzbatuese që lidhen me sigurinë publike në çdo komunitet përgjatë zbatimit të paketës të sigurisë në shkolla. U kemi besuar prefektëve rolin drejtues në këtë proces dhe na ka rezultuar të jetë një rol efikas, por gjithashtu kemi identifikuar edhe disa ndryshime që lidhen me ta do të thosha unë, nevojën e rregullimit dhe të përcaktimit më qartë të vendimeve të Këshillave Bashkiakë apo të akteve të tjera të Njësive të Qeverisjes Vendore, të cilat kalojnë përmes filtrit ligjor të prefektit për ta reduktuar këtë numër në mënyrë që të lehtësojmë procesin e qeverisjes vendore, por pa harruar asnjëherë rolin shumë të rëndësishëm që ka prefekti në këtë kontroll.

Kështu që në këtë aspekt këto do të ishin disa prej çështjeve kryesore që mund të ndajmë në këtë proces të parë. Kujtojmë që është një ndryshim në ligj. Do të kemi mundësi që gjatë diskutimit në Kuvend që bashkë me deputetë, por dhe përfaqësues të tjerë ta diskutojmë më gjerë këtë nisëm ligjore. Dua të informoj publikun se kemi marr si referencë eksperiencat më të mira të rolit të Prefektit, kryesisht modeli francez, ai italian apo dhe rumun dhe besoj që pas miratimit të këtij ligji do të kemi një institucion Prefekti shumë më efektiv në procesin e ndërlidhjes mes qeverisë qendrore, qeverisë vendore dhe mbi të gjitha të organizimit më të mirë të punës në nivel vendor të agjencive shtetërore”, bëri të ditur ministri.

Balla mohoi zërat se me kompetencat e reja, prefekti mund të kërkojë shkarkimin e kryetarit të Bashkisë.

“Ka qenë një informacion i rremë lidhur me këtë qasje. Qeveria ka të drejtën e rasteve të propozimit të shkarkimit dhe në ligjin “Për qeverisjen vendore” përcaktohet qartë si zhvillohet ky proces dhe që vendimin përfundimtar e jep Gjykata Kushtetuese. Pra nuk ka një lajm lidhur me këtë pretendim të ngritur në media dhe nuk është e shkruar në ligj, nuk është e vërtetë”, tha ai.

Gjithashtu, ministri i Brendshëm theksoi se kompetencat e reja të prefektit nuk lënë hapësira përplasje me kryetarin e Bashkisë.

“Nuk ka asnjë përplasje të kompetencave të Prefektit dhe Kryetarit të Bashkisë. Prefekti është përfaqësuesi vendor i Këshillit të Ministrave. Ajo që për mua sot ka më shumë rëndësi, sa i përket rolit të Prefektit, është drejtimi i Këshillit Vendor të Sigurisë Publike, i cili bën bashkë të gjitha agjencitë për të garantuar sa më shumë siguri publike në çdo komunitet. Unë ju thashë nga zbatimi i Paketës së Sigurisë në Shkolla në territor, kemi kuptuar sa e rëndësishme është koordinimi i të gjitha agjencive ligjzbatuese në funksion të rritjes së cilësisë së sigurisë publike. Kemi qenë e mbetemi të qartë me publikun, Shqipëria kampione e Ballkanit jo vetëm në turizëm, por edhe në çdo fushë tjetër përfshirë sigurinë publike nuk është më një ëndërr, por një realitet për të cilën punojmë ta realizojmë çdo ditë”, nënvizoi Balla./ CNA