Vendi nën pushtetin e motit të keq/ Si paraqitet situata në Qarkun e Korçës

21 Nëntor 2025, 15:36, Aktualitet CNA

Vendi nën pushtetin e motit të keq/ Si paraqitet situata në

Prej ditësh vendi ynë është nën pushtetin e motit të keq. Ka patur përmbytje, evakuime banorësh, banesa pjesërisht të shembura, fshatra pa energji elektrike, si pasojë e reshjeve të dendura të shiut.

Më poshtë po ju paraqesim si paraqitet situata nga moti i keq në qarkun e Korçës.

Bashkia Korçë:

Ka prezencë uji në tokat bujqësore dhe në disa banesa në Lumalas, Bulgarec, Shamoll, Çiflig e Turan. Grupet janë në terren. Në fshatin Dërsnik pati rënie të dy shtyllave, u njoftua O.SH.E.E dhe u morën masa për të ndërhyrë. Në fshatin Qatron pati një dëmtim të linjës së ujit të pijshëm. U morën masa për riparim.

Bashkia Pogradec:

Pati prurje nga lumi i Vërdovës, Rëmenjit dhe Qytetit.Në fshatrat Rëmenj e Gështenjas raportohet për prezencë uji në banesa. Në fshatrat Dardhas, Proptisht e Çërravë ka pasur rrëshqitje të dherave. Po punohet në hidrovorin e Tushemishtit për stabilizimin e situatës. Strukturat e bashkisë, si grupet e ujësjellës–kanalizimeve dhe shërbimi zjarrfikës vazhdojnë të jenë në terren për menaxhimin e situatës.

Bashkia Maliq:

Lumi Dunavec është çarë në disa pika, duke shkaktuar përmbytje në disa sipërfaqe të tokave bujqësore. Aktualisht po ndërhyhet me mjet. Në fshatrat Vlocisht e Sovjan pati prezencë uji në oborre banesash. Në fshatin Sovjan u evakuuan 15 familje gjatë natës. MZSH ndërhyri për normalizimin e gjendjes.

Bashkia Pustec:

Prej orëve të para të ditës së sotme është ndërhyrë për largimin e ujit nga 4 banesa në Shulin e Pustec. Ndërkohë po mbahet nën kontroll situata në fshatin Shulin ku uji mund të depërtojë në katet përdhese të banesave.

Bashkia Devoll:

Raportohet për një person të humbur në fshatin Progër, Bashkia Devoll. Djali i zonjës F.H., 76 vjeçe, na sinjalizoi se zonja ka dalë nga shtëpia në mëngjes dhe nuk është kthyer. Kemi angazhuar në aksionin e kërkimit forcat e Repartit Ushtarak 1033 Drenovë dhe forcat e DVP Korçë.

Situata në fshatin Progër vijon të jetë problematike. Niveli i ujit është duke u ulur ngadalë, vazhdon kërkimi. Situata në fshatin Mançurisht vijon të përmirësohet me ritme të ngadalta. Aksi Sinicë-Arzë u hap plotësisht, vijon qarkullimi normalisht.

Bashkia Kolonjë:

Gjendja e rezervuarëve të Helmesit dhe Kabash - Leskovik me kapacitet maksimal. Probleme me infrastrukturën e urave në Qafëzez, Shtikë, Gostivisht, Psar: Ura pasarele e fshatit Blush e shkatëruar, Mesicke me probleme këmbëza, po vijohet puna në fshatin Taç Poshtë dhe fshatin Psar për hapjen e rrugës në vendin e quajtur karburanti. Përmbytje të tokave bujqësore, sipërfaqësore në Mollas, Psar, Mesickë, Taç Poshtë Gostivisht, Qafëzez, Selenicë. Me mjetet e bashkisë po ndërhyhet në Taç Poshtë dhe në rrugën që lidh fshatin Gjonc me Prodan.

O.SH.E.E:

Situata aktuale raportohet:

Fideri Vithkuq nënstacioni Rehovë, pjesërisht në punë, pa energji zonat Lekas, Marjan, Shtyllë 289 abonentë.

Fideri Tuneli nënstacioni Pogradec me tokë

Fideri 6 nst Mollas, pjesërisht pa energji, zona Kurtesh 11 abonentë ruralë.

Fideri Frigorifer nënstacioni Gjanç i çkyçur për masë sigurie, prezencë uji në linjën TM.

Fideri 9 nënstacioni Lozhan, pjesërisht në punë, 500 abonentë pa energji elektrike

Aktualisht gjithsej 800 abonentë pa energji elektrike.

A.RR.SH:

Gjate natës, në akset rrugore Korçë – Ersekë ka pasur reshje shiu me intesitet mesatar e të lartë, ka prani të ujit dhe inerte në vende ku ka dalje përrenjsh e lumi, po punohet për pastrimin e tyre.

Akset Zemblak-Dog. Goricë, Bilisht - Miras, ka pasur reshje shiu me intesitet mesatar e të lartë. Ka pasur rënie gurësh në rrugë, po punohet për pastrimin e tyre.

Në aksin rrugor Maliq-K.Gramsh ka rënie gurësh në zonën kryesisht e Strelcë Lozhanit. Në zonën e quajtur te shkëmbi Dobercanit ka rrëshqitur një shkëmb i cili bllokoi rrugën dhe pas ndërhyrjes së subjektit u bë e mundur hapja e rrugës.

Në aksin rrugor Korçë-Voskopojë gjatë natës ka pasur rrëshqitje dheu + bllokime tombinosh dhe dherash tek Ura e Turanit dhe pas ndërhyrjes së subjektit të mirëmbajtjes u bë i mundur pastrimi i tyre.

Aksi rrrugor K/ Boboshticë-Dardhë km 10 pati rënie inertesh në rrugë, kompania po vazhdon me pastrimin e tyre.

D.V.P KORÇË

Shërbimet e policisë kanë qenë të pranishme në mënyrë të vazhdueshme në territor për mbikëqyrjen e situatës dhe ofrimin e ndihmës në rast nevoje.

Në akset kryesore kanë qenë me shërbim në mënyrë të pandërprerë punonjësit e policisë rrugore, të cilët kanë marrë informacion dhe kanë bashkëpunuar me subjektet e mirëmbajtjes së rrugëve, duke ndërhyrë në mënyrë të menjëhershme dhe siguruar qarkullimin e lirë të këtyre akseve dhe në asnjë moment nuk është bërë bllokimi i tyre.

Në dy raste, në qytetin e Pogradecit në një banesë dhe në fshatin Sovjan, Bashkia Maliq në dy banesa, punonjësit e policisë kanë ndërhyrë për evakuimin e disa banorëve nga banesat e tyre, që rrezikonin mbytjen.

Strukturat vendore dhe ekipet e emergjencave vijojnë monitorimin dhe ndërhyrjet në të gjitha zonat problematike. Prefektura vijon monitorimin dhe koordinimin me të gjitha strukturat përgjegjëse për garantimin e sigurisë së qytetarëve./ CNA