E fundit!

10:21 Aktualitet

Fshehu qindra mijëra euro në tubimin e aspirimit/ Amnistia Penale nxjerr nga burgu pastruesen “famoze”

Rozeta Dobi, e dënuar për vjedhjen e një shume të konsider...

"Vëllai i Madh dhe Vëllai i Madh Fare"/ Edi Oga: Jeta dhe "fiksioni" ngjajnë

5 Shkurt 2023, 10:20, Aktualitet CNA

"Vëllai i Madh dhe Vëllai i Madh Fare"/ Edi Oga: Jeta dhe

Gazetari Edi Oga

Gazetari Edi Oga, nëpërmjet një reagimi në rrjetet sociale, shkruan se shqiptarët në realitet vuajnë çdo ditë vullnetin e "Vëllait të Madh" politik dhe vullnetin e "Vëllait të Madh Fare", që zotëron fuqitë e botës.

Më tej gazetari thekson se shqiptarët e kanë të pamundur të ngrihen kundër "Vëllait të Madh" të realitetit, ndaj dhe kanë zgjedhur rrugën më të lehtë të sjellin "Vëllain e Madh" të fiksionit, me shpresë se "Vëllai i Madh Fare" do të ndëshkojë "Vëllain e Madh" të jetës sonë reale.

“"Vëllai i Madh" dhe "Vëllai i Madh Fare"!

Më parë, "fiksioni" frymëzohej nga jeta dhe e tejkalonte atë. Sot, jeta frymëzohet nga "fiksioni" dhe shkon përtej tij. Sot njerëzit janë "lojtarë" të një eksperimenti social të pakufizuar në kohë dhe në ligësi. Ata jetojnë të burgosur në kufij mendorë më tepër sesa fizikë. Pothuaj çdo gjë që bëjnë, atyre u diktohet nga "Vëllai i Madh Fare". U diktohen vendbanimi, edukimi, profesioni, sjellja, ushqimi, veshja, sëmundjet dhe vaksinat. Njerëzve u thuhet se janë të lirë të zgjedhin, por kjo liri është gjithnjë e më relative, sepse zgjedhjet janë gjithnjë e më tepër të kufizuara dhe të përqendruara në gjithnjë e më pak duar individësh mendjembrapshtë. Të stresuar e të frustruar nga diktati i "Vëllait të Madh Fare", njerëzit mezi presin të vihen ata vetë në rolin e tij. Kjo është arsyeja që ata apasionohen dhe konformohen me "Vëllain e Madh" të fiksionit. Është e vetmja mundësi që frustrimet e tyre ti shohin tek të tjerë, duke pasur sadopak mundësi (televotimin) të frustrojnë edhe ata dikë. Të jenë edhe ata pak "Vëlla i Madh" në këtë jetë.

Në realitet, ne shqiptarët vuajmë çdo ditë vullnetin e "Vëllait të Madh", pushtetit politik. Të gjithë së bashku, përfshirë edhe "Vëllain e Madh", vuajmë vullnetin e "Vëllait të Madh Fare", pushtetin e fuqive që zotërojnë Botën.

Sot e kemi të pamundur të ngrihemi kundër "Vëllait të Madh" të realitetit, ndaj zgjedhim rrugën më të lehtë, atë të të sjellurit ne vetë, si "Vëllai i Madh" i fiksionit, me shpresë se "Vëllai i Madh Fare" do të ndëshkojë "Vëllain e Madh" të jetës sonë reale dhe ne do të kemi mundësi të frustrohemi më pak dhe të jemi një buxhet ushqimor më të madh, të paktën javën që vjen” shkruan Edi Oga.