Veliaj inspekton punimet në Liqenin e Çekrezës/ Zbulon projektet e reja

23 Gusht 2023, 15:14, Aktualitet CNA

Veliaj inspekton punimet në Liqenin e Çekrezës/ Zbulon

Kryetari i Bashkisë Tiranë, Erion Veliaj, ka inspektuar punimet për rehabilitimin e digës mbi Liqenin e Çekrezës dhe rrugës drejt këtij liqeni.

Gjatë inspektimit Veliaj tha se ato do të përfundojnë deri në fund të gushtit, ndërsa ftoi qytetarët dhe biznese të investojnë me agroturizme në këtë zonë, për ta shndërruar në një tjetër destinacion, si ai i Parkut të Liqenit të Farkës.

“Ky liqen ishte konceptuar, ashtu si liqeni i Farkës, vetëm për vaditje, kurse sot, përveç vaditjes, që e kemi të garantuar me një kolonë të hapjes e mbylljes së automatizuar të portave, me një digë të përforcuar dhe gjithë sistemin e emergjencës nëse diga tejmbushet, duke kaluar në vetëshkarkim, kemi krijuar edhe mundësinë që ajo të shërbejë, po ashtu, edhe si hapësirë për argëtim dhe çlodhje. Bashkë me digën kemi bërë edhe investimin e rrugës, ndaj për të ardhur në Çerkezë, vetëm 15 km nga Tirana, do të jetë edhe më e thjeshtë. Këtë projekt do ta quajmë të mbyllur deri në fund të gushtit, por me mbylljen e këtij projekti hapet një ftesë për të gjithë ata që duan të investojnë këtu në agroturizëm, për të gjithë ata që duan të blejnë prona, të krijojnë rezidenca, sepse besoj se eksperienca fantastike e Liqenit të Tiranës dhe Farkës, ku u rehabilitua e gjithë pista, duhet të na çojë në më shumë aksione të tilla,” u shpreh Veliaj.

Ndër të tjera, kryebashkiaku deklaroi se do të ndërhyhet dhe në Liqenin e Linzës dhe thekson se do t’i japë një hov të ri zhvillimi gjithë zonës së Freskut.

Ai shtoi gjithashtu se një projekt tjetër është lidhja mes Zall Herrit dhe Tufinës, aty ku përfundon Rruga e Arbrit.

“Plani tjetër është liqeni i Linzës. Është një liqen më i vogël, por në një zonë më të dendur. Dua që ta hapim edhe këtë zonë për ata që duan të bëjnë agroturizëm dhe zona rezidenciale. Po të shihni, është rrethuar me një ullishte, është disa herë më e sistemuar dhe më e lidhur me infrastrukturë seç ka qenë Farka, kur ne filluam investimin. Një projekt tjetër, që besoj do jetë jetik për Zall Herrin, është lidhja mes Zall Herrit dhe Tufinës, aty ku përfundon Rruga e Arbrit. Në fakt, segmenti në vijë ajrore është shumë i shkurtër, por s’ka infrastrukturë,” deklaroi Veliaj./CNA