web counter
LEXO PA REKLAMA!

SHKARKO APP

App Store
Google Play

E fundit!

x

Ujësjellësit, 91% e subvencioneve të qeverisë shkuan për borxhe energjie

30 Gusht 2024, 07:24, Aktualitet CNA
Ujësjellësit, 91% e subvencioneve të qeverisë shkuan
Foto ilustruese

Shoqëritë e ujësjellës kanalizimeve në vend arritën të gjeneronin 10.3 miliardë lekë të ardhura në vitin 2023 apo më shumë se 100 milionë euro, por shumica prej tyre ende nuk mbulojnë kostot e tyre operative.

Në mbështetje të shoqërive ku pjesa më e madhe i janë nënshtruar reformës së bashkimit qeveria shpërndau 310 milionë lekë apo më shumë se 3 milionë euro në formën e subvencioneve. Raporti i Performancës i Entit Rregullator të Ujit nënvizon se kjo shumë subvencionesh është ulur me 50 milionë lekë apo 500 mijë euro krahasuar me një vit më parë. Përfitimi i subvencioneve bëhet vetëm pas plotësimit të disa kushteve.

“Për këtë vit, subvencione kanë përfituar vetëm gjashtë shoqëri UK Rajonale, respektivisht, Durrës, Elbasan, Fier, Lezhë, Shkodër, Vlorë. Shoqëritë e reja rajonale të krijuara dhe regjistruara brenda vitit 2023, UK rajonale Shkodër dhe Vlorë janë subvencionuar me 30.000.000 lekë, pjesa e mbetur e fondit të subvencionit është përdorur për shlyerjen e detyrimeve të energjisë elektrike për shoqëritë që e kanë mbi 75% të prodhimit me ngritje mekanike si dhe ato shoqëri që kanë krijuar detyrime të reja për energjinë gjatë vitit 2023 për shkak të kostove të larta të energjisë, kriter i cili është zbatuar për të subvencionuar shoqëritë Rajonale UK Durrës, Elbasan, Fier dhe Lezhë.

Kjo lidhet edhe me strategjinë e qeverisë qendrore, e cila u ka dhënë prioritet me mbështetje financiare shoqërive UK të cilat janë bërë pjesë e reformës sipas VKM nr. 302 ku MIE/AKUK është aksionare me 51% të aksioneve”, thuhet në raport.

Ndërkohë, kanë mbetur pa marrë fonde nga qeveria qendrore shoqëritë që nuk janë bashkuar ende, përkatësisht: UK Tiranë, UK Vorë dhe UK Kamëz, të cilat përbëjnë 1 shoqëri UK Rajonale.

Po ku kanë shkuar kryesisht paratë e subvencioneve? Sipas raportimit shpërndarja e subvencioneve është bërë 90.8% për mbulimin e kostove të energjisë elektrike, 4.6% për sigurime shoqërore dhe shëndetësore të papaguara, 4.5% janë shpërndarë për paga të papaguara dhe 0.1% për tatime e taksa të papaguara.

Raporti i ERRU ndalet edhe te shoqëritë që kanë rritje të përgjithshme të të ardhurave. Nga 10.3 miliardë që ishte totali shifra ka një rritje me 104 milionë në raport me një vit më parë.

Shoqëritë Rajonale UK që kanë rritjen më të madhe të të ardhurave janë UKR Durrës (+101 milionë lekë), për shkak të rritjes së numrit të lidhjeve FU dhe KUN si dhe rritjes së nivelit të faturimit dhe eliminimit të lidhjeve të paligjshme nëpërmjet task-forcës; UKR Lushnje (+48.5 milionë lekë), kryesisht për shkak të rritjes së numrit të lidhjeve FU (+801 lidhje).

Të tjera shoqëri me të ardhura më të larta, krahasuar me vitin paraardhës janë: UKR Pogradec (+43.1 milionë lekë), UKR Sarandë (+26 milionë lekë), UKR Lezhë (+22.3 milionë lekë), UKR Berat (+19.3 milionë lekë), UKR Fier (+17.3 milionë lekë), UK Vorë (+14.9 milionë lekë) dhe UK Kamëz (+ 7.9 milionë lekë), UKR Dibër (4.7 milionë lekë) dhe UKR Shkodër (2.9 milionë lekë).

Të gjitha shoqëritë e tjera kanë rënie të të ardhurave krahasuar me vitin paraardhës, duke filluar nga UK Tiranë (-73 milionë lekë), UKR Vlorë (-69.7 milionë lekë), UKR Elbasan (-44.9 milionë lekë), UKR Korçë (-7.9 milionë lekë), UKR Kukës (-5 milionë lekë) dhe UKR Gjirokastër (-4.1 milionë lekë)./Monitor





Lajmet e fundit nga