web counter
LEXO PA REKLAMA!

SHKARKO APP

App Store
Google Play

E fundit!

x

“Tragjedi e paralajmëruar”/ Korreshi denoncon skandalin në spitalin e Lushnjës

15 Shkurt 2026, 14:29, Aktualitet CNA

“Tragjedi e paralajmëruar”/ Korreshi denoncon skandalin në

Deputeti i PD-së, Saimir Korreshi ka denoncuar në rrjetet e tij sociale, një skandal në spitalin e Lushnjës ku sipas tij rrezikohet jeta e punonjësve, pacientëve dhe familjarëve.

Në postimin e tij, Korreshi ka publikuar disa dokumente, për të cilat thotë se tregojnë situatën që po ndodh me kushtet e sigurimit teknik.

Në shkresa thuhet se ku punonjësit e repartit të oksigjenit kanë paralajmëruar për rrezik maksimal dhe mundësi katastrofe për shkak të kushteve në repartin e gazeve mjekësore.

Korreshi bën thirrje ministres së Shëndetësisë dhe organeve ligjzbatuese të hetojnë rastin.

Postimi i plotë:

Skandal në spitalin e Lushnjes.

Një skandal i rëndë ka ndodhur dhe vazhdon të ndodhë në Spitalin e Lushnjes, në kufijtë e dramës, ku rrezikohet jeta e punonjësve të Oksigjenit, por edhe e pacientëve dhe familjarëve të tyre.

Jam bërë me dije për disa relacione dhe dokumenta shqetësues, të cilat po i publikoj më poshtë, ku punonjësit e repartit të oksigjenit në Spitalin e Lushnjes kanë bërë me dije drejtorin dhe gjithë ekipin drejtues të këtij spitali për pasojat e rënda dhe dramën e madhe që ndodh me kushtet e sigurimit teknik, më konkretisht:

Me shkresën nr. Prot. 1932, datë 13.12.2024, specialistët e repartit të oksigjenit i drejtohen për arsye se: “Prezantimi i gjendjes teknike në spitalin Lushnje në repartin e gazerave mjekësore (oksigjen, azot), ku nuk ekzistojnë rregullat e sigurimit teknik dhe rrezikshmëria është në kufijtë maksimale, ku në çdo kohë jemi përballë një katastrofe me pasoja të paparashikuara”.

Vazhdojnë në shkresën e tyre për avaritë dhe pasojat e ndodhura, deri tek shpërthimet e bombulave me kriter 2 m, që kanë rrezikuar jetën e punonjësve. Flaka e zjarrit që ka marrë dhe shkrirja e rregullatorëve është vënë nën kontroll nga punonjësit.

Ata i shkruajnë drejtorit patronazhist se nuk ka asnjë fikëse zjarri në ambient.

Ata ankohen se bombulat e oksigjenit ruhen jashtë kushteve të sigurimit teknik dhe në rrezik të shtuar. Magazina që shërben për depozitimin e tyre është e mbyllur dhe nuk hapet nga përgjegjësi, i cili, gjejeni pak, është ai që rrahu mjekun në Spitalin e Lushnjes dhe shok me patronazhistin drejtor.

Me presionin që kanë bombulat, rrezikohet të hidhet në erë spitali. Tragjedi e paralajmëruar.

Me shkresën nr. Prot. 1938, datë 16.12.2024, specialistët e Oksigjenit i drejtohen Drejtorit për konstatim defekti, ku bëjnë me dije edhe shpërthimin e ndodhur në datën 14.12.2024, shpërthim i fuqishëm që thuhet se ka prishur teknikën dhe gjithë rrjetin shpërndarës, ku edhe është rrezikuar jeta e një specialisti. Kërkonin blerje fikse zjarri dhe lirimin e magazinës. Shpërthimi i bombulës thuhet se ka ardhur nga ventili shumë i konsumuar dhe fati ka qenë se bombulat e tjera ishin bosh. Ngrenë shqetësimin për shefen e financës, Bedrie Greca, që nuk ka planifikuar fondet e domosdoshme.

Me shkresën nr. 1974, datë 20.12.2024, është kërkuar që, në lidhje me problemet e konstatuara në repartin e oksigjenit, të mos jetë më përgjegjës Altin Alla, shoku i drejtorit.

Në datën 26.12.2024, nga ish-drejtuesi i Spitalit është dhënë masë vërejtje me paralajmërim për pushim nga puna për Altin Allën dhe është shkarkuar si përgjegjës i oksigjenit.

Me ardhjen e patronazhistit Roland Ziu si drejtor spitali, në datë 27.02.2025, me nr. Prot. 62, ka riemëruar, edhe pse me masë, përsëri përgjegjës Altin Allën tek oksigjeni, edhe pas dramave të paralajmëruara.

Zërat vazhdojnë të thonë se zëvendësimi i tubave të oksigjenit nga godina që do riparohet (7 muaj e prishur se nuk jepet leja e ndërtimit) tek godina e improvizuar e urgjencës janë po të njëjtët, vetëm se të lyer, edhe pse ka pasur një tender për këto. Por kjo në një moment tjetër.

Ky skandal nuk mund të mos hetohet dhe të mbahet përgjegjësi, ndaj i drejtohem ministres së Shëndetësisë dhe organeve ligjzbatuese të hetojnë rastin. /CNA





Lajmet e fundit nga