web counter
LEXO PA REKLAMA!

SHKARKO APP

App Store
Google Play

Tensionet mes demokratëve dhe mediave në protestë/ Reagojnë shoqatat e gazetarëve

16 Maj 2025, 20:16, Aktualitet CNA

Tensionet mes demokratëve dhe mediave në protestë/ Reagojnë

Shoqatat e gazetarëve kanë reaguar pas tensioneve të ndodhura në protestën e opozitës mes demokratëve dhe mediave.

Asociacioni i Gazetarëve në një reagim paraprak u bëri thirrje zyrtarëve të PD të ndalojnë sulmet ndaj gazetarëve.

“Asociacioni i Gazetarëve të Shqipërisë i bën thirrje urgjente zyrtarëve të Partisë Demokratike të ndalojnë menjëherë sulmet ndaj gazetarëve në protestën e opozitës”, thuhet në deklaratë.

 

Një reagim ka ardhur dhe nga Unioni i Gazetarëve, ku ka dënuar gjuhën e përdorur daj gazetarëve.

Në reagimin e tyre thuhet se gazetarët nuk kanë asnjë angazhim politik, por vetëm misionin e raportimit.

Më tej kërkohet ndaj opozitës reflektim për këto episode.

“Unioni i Gazetarëve dënon gjuhën agresive ndaj gazetarëve nga drejtues të opozitës

Tiranë më 16 Maj 2025

Unioni i Gazetarëve Shqiptarë e konsideron të papranueshme gjuhën e disa prej drejtuesve të partisë kryesore të opozitës ndaj gazetarëve në protestën kundër procesit zgjedhor të 11 majit, të zhvilluar në Bulevardin Zog i I në Tiranë.

Reporterët dhe operatorët e mediave u janë drejtuar krerëve të protestës opozitare me pyetje dhe si përgjigje, prej tyre dhe mbështetësve të pranishëm, kanë marrë reagime dhe etiketime të palejueshme.

Gazetarët e pranishëm në aktivitete politike apo protesta nuk kanë asnjë angazhim politik, por vetëm misionin e raportimit dhe të pasqyrimit të asaj që ndodh. Çdo etiketim apo polemikë me reporterët, në protestat e subjekteve politike, janë të papranueshme dhe përbëjnë shkelje të etikës dhe cënim të lirisë së shprehjes, raportimit dhe kërcënim në krye të detyrës.

Tendenca për të politizuar pyetjet apo këmbënguljen e gazetarëve për shkak të pyetjeve të tyre, është e gabuar dhe na kthen në fillimet e pluralizmit politik shqiptar dhe në mendësitë e kulturës së munguar të diversitetit demokratik.

UGSH dënon këto episode, agresionin verbal dhe stigmatizimet që deputetë dhe drejtues të vecantë të opozitës dëshmuan në këtë aktivitet politik të tyre.

Kërkojmë prej opozitës dhe përfaqësuesve të saj, të pranishëm në këtë ndodhi, të reflektojnë në respekt të medias, rolit të gazetarisë dhe pavarësisë së gazetarëve në përgjithësi.

Betejat e opozitës janë të lidhura dhe duhet të mbesin vetëm brenda politikës, me palët dhe kundërshtarët politikë të saj. Gazetarët janë përfaqësues të një pushteti tjetër në demokraci.

Nuk është e drejtë që për arsye të kundërshtarëve apo armiqve politikë, sikundër është karakterizuar klasa jonë politike, të shtojë në listën e armiqve gazetarët dhe rolin e mediave. Kjo është e papranueshme!

UGSH shpreh solidaritetin e fuqishëm me kolegët dhe operatorët që u përballën me këtë situatë në protestën e thirrur prej opozitës.

Apelojmë që forumet dhe drejtuesit e lartë të opozitës të distancohen urgjentisht nga ky rast dhe sjellje të kësi shembujve, në marrëdhënien me gazetarët në detyrë”, thuhet në reagim./ CNA





Lajmet e fundit nga