Spiro Bardhi dhe Bofill skuqin Dhërmiun

28 Shkurt 2025, 11:56, Aktualitet CNA

Red Sol Resort, një kompleks i gjithi i kuq është resorti më i ri që po ndërtohet në bregdetin e Dhërmiut. I projektuar nga studioja spanjolle Bofill, kompleksi është konceptuar në formën e një fortese, e ngjyrosur e gjitha me një të kuqe të fortë. Kompania ndërtuese e resortit është Drymades Gallery, e zotëruar nga biznesmeni Spiro Bardhi, që ndryshe njihet me nofkën Ragami.

Dizajni si labirint mishëron një kështjellë bashkëkohore të vendosur në terrenin e thepisur të bregut të Jonit. Struktura përbëhet nga pavione, apartamente dhe vila të ndërlidhura në një sërë sheshesh në lartësi të ndryshme. Shkallët, urat dhe vendkalimet kryqëzohen në të gjithë vendin, duke i dhënë resortit një karakter të ngjashëm me labirintin.

I lyer me një të kuqe të gjallë prej dheu, resorti me praninë e tij të ngjashme me fortesë është në kontrast me të gjelbrën dhe blunë përreth. Të ndërlidhura nga një rrjet shkallësh, urash dhe shtigjesh të jashtme, blloqet e ndryshme përfshijnë pishina, oborr spanjoll dhe pika vëzhgimi të veçuara.

Bregdeti i jugut si laborator

Spiro Bardhi dhe Bofill skuqin Dhërmiun

Bregdeti i Jugut është shndërruar në një laborator, ku studiot e ndryshme arkitekturore të botës bëjnë eksperimentet e tyre. Në fakt ky është një nga bizneset më të mëdha të momentit në Shqipëri.

Të gjithë ndërtuesit që futen për leje detyrohen të kontraktojnë një studio arkitekturore nga jashtë për të marrë lejen e ndërtimit. Ky është një kusht i panegociueshëm i vendosur nga vetë kryeministri, veçanërisht vitet e fundit. Dhe është biznes i madh sepse arkitektët e huaj janë duke marrë miliona euro në Shqipëri.

Bregdeti i jugut u është besuar kryesisht studiove spanjolle.

Ndërtuesi

Spiro Bardhi dhe Bofill skuqin Dhërmiun

Leja për Red Sol është dhënë nga KKT në qershor të vitit të kaluar. Madje në atë mbledhje, në rendin e ditës ka qenë miratimi si i lejes së zhvillimit ashtu dhe i asaj të ndërtimit. Kompania ndërtuese Drymades Gallery është themeluar në fund të vitit 2022. Aksionet e saj zotërohen 100 për qind nga biznesmeni korçar Spiro Bardhi.

Bardhi nuk është një emër i panjohur për publikun. Ai zotëron një nga hotelet më të njohura në Korçë, In Galery. Por kjo nuk është arsyeja e vetme e famës së tij në publik.

Në të shkuarën Bardhi është sulmuar nga opozita si oligarku, i cili kontrollon ekonominë e Korçës. Sali Berisha e ka denoncuar atë publikisht si bosi famoz i Korçës, që qëndron mbi ligjin./ Kapital.al