Sot shenjtërimi i Nënë Terezës, reagimet nga politika

5 Shtator 2024, 10:17, Aktualitet CNA

Sot shenjtërimi i Nënë Terezës, reagimet nga politika

Nënë Tereza

Sot, më 5 shtator, është Dita e Shenjtërimit të Nënë Terezës, nëna e madhe e të varfërve, fituese e çmimit Nobel për Paqen, e cila kurrë nuk e mohoi origjinën e saj.

Kjo ditë është festë zyrtare në Shqipëri.

Në ditën e shenjtërimit të saj nuk ka munguar edhe një reagim nga kryeministri Edi Rama, i cili shprehet: "Mirëmëngjes dhe në këtë Ditë të Shenjtërimit të gruas së paqes në botë, shqiptares Nënë Tereza, ju uroj një ditë të bukur".

Nuk ka munguar edhe një reagim nga presidenti Bajram Begaj.

Kreu i shtetit shprehet në një postim në rrjetet sociale: "Sot kremtojmë ditën kushtuar bijës së shenjtë shqiptare, Nënë Terezës, shembull i fuqisë së shpirtit dhe besimit, me një jetë të kaluar në dedikim e shërbim ndaj të vuajturve. Mësimet e saj mbeten frymëzim për cdo shqiptar dhe mbarë njerëzimin".

Ndërkohë ministri i Jashtëm shkruan në rrjetet sociale: "Kënaqësi të mirëprisja në Tiranë homologen finlandeze , Elina Valtonen. Diskutuam hapat konkretë për forcimin e lidhjeve dypalëshe mes vendeve tona, veçanërisht në tregti, investime dhe turizëm, si dhe ftesën për kompanitë finlandeze për të investuar në Shqipëri. Shkëmbyem pikëpamjet mbi zgjerimin e Bashkimit Evropian dhe integrimin e Ballkanit Perëndimor. Shpreha mirënjohjen për mbështetjen e palëkundur të Finlandës në këtë proces. Shqipëria mbetet e angazhuar për bashkëpunimin shumëpalësh, veçanërisht me kryesimin e OSBE nga Finlanda, vitin e ardhshëm".

Profil:

Anjezë Gonxhe Bojaxhiu lindi më 26 gusht 1910 dhe u nda nga jeta më 5 shtator 1997. Ajo ishte e njohur si Nënë Tereza e Kalkutës, ishte një murgeshë dhe misionare katolike indiane me prejardhje shqiptare.

U lind në Shkup, asokohe qendra e Vilajetit të Kosovës në Perandorinë Osmane. Jetoi në vendlindje për tetëmbëdhjetë vjet, ajo u shpërngul në Irlandë dhe më pas në Indi, ku jetoi pjesën më të madhe të jetës së saj.

Nënë Tereza themeloi Misionarët e Bamirësisë, një kongregacion katolik, i cili në vitin 2012 kishte më shumë se 4,500 motra dhe ishte aktiv në 133 shtete. Ato ofrojnë shtëpi për njerëzit që janë duke vdekur nga HIV/AIDS, lebra dhe tuberkulozi; ato ofrojnë ushqime, klinika të lëvizshme, programe këshilluese për fëmijët dhe familjet, jetimore, dhe shkolla. Anëtarët duhet t’i përmbahen betimit të "dëlirësisë, varfërisë dhe bindjes", si dhe një kusht të katërt, për të dhënë "shërbime falas e me gjithë zemër për më të varfrit e të varfërve".

Nënë Tereza ishte një tregtare e njohur. Ishte bashkëpronare e një firme ndërtimi në Shkup. Kompania e saj bëri bashkëfinancimin e projektit për ndërtimin e teatrit të parë të Shkupit. Ajo mori pjesë në zhvillimin e linjës hekururodhe që e lidh Kosovën me Shkupin, projekt që e kishte financuar personalisht.

Nënë Tereza është nderuar me çmimet dhe nderimet më të larta, duke përfshirë: më 1962 Çmimin e Paqes Ramon Magsaysay dhe 1979 Çmimin Nobel për Paqe./CNA