Sondazhi/ Si i vlerësoni ndryshimet estetike në fytyrë?

5 Dhjetor 2023, 20:59, Aktualitet CNA

Sondazhi/ Si i vlerësoni ndryshimet estetike në fytyrë?

Foto ilustruese

Ndryshimet estetike janë një trend në rritje kudo nëpër botë, ku përjashtim nuk bën edhe Shqipëria.

Dëshira e vajzave dhe grave për të ndryshuar pamjen, apo për të mbuluar linjat e holla që shfaqen me kalimin e viteve apo me mospërkujdesjen e lëkurës, shpesh iu kushton shumë.

Kemi dëgjuar raste të pafundme për përkeqësimet shëndetësore që sjellin madje dhe humbje jete nga ndërhyrjet estetike.

Por le të ndalemi tek ndërhyrjet që përdoren më së shumti nga një pjesë e madhe e vajzave dhe grave në Shqipëri që është botoksi.

Injeksionet e botoksit janë krijuar për t’i relaksuar muskujt e fytyrës, me qëllim të zbutjes së rrudhave.

Fillerët mbushin linja në fytyrë ose shtojnë volumin në pjesë të caktuara, si buzët apo faqet.

Shumica e mbushësve të lëkurës përmbajnë një substancë natyrale, të quajtur acid hialuronik, dhe zgjasin nga gjashtë deri në 18 muaj.

Sipas raportimeve të mediave botoxi fillon me përpjekjet “për të luftuar plakjen” deri te dëshira për të qenë në hap me "VIPAT" e rrjeteve sociale.

Por mospasja kujdes dhe mos kryerja si duhet e procedurave dhe në vendet e duhura mund të sjellë pasoja të rënda për shëndetin tuaj madje mund të rrezikoni dhe jetën.

Ky shqetësim është ngritur dhe nga mjekët të cilët janë të shqetësuar për faktin se botoksi injektohet dhe nga ata të ashtuquajturit estetistë, por që thjesht janë parukierë dhe nuk kanë njohuritë e duhura për të realizuar ndërhyrje të tilla.

Profesionistët shprehen të shqetësuar, sepse ndërhyrjet e tilla, sipas tyre, duhet t’i bëjnë vetëm kompetentët si: mjekët e kirurgjisë maksillofaciale, mjekët e kirurgjisë plastike, dermatologët apo oftalmologët.

Mjekët thonë se viteve të fundit, është rritur numri i rasteve të komplikimeve shëndetësore si “rezultat i aplikimeve të produkteve të ndryshme për çështje estetike në fytyrë”.

Alergji, deformim i vendit ku është aplikuar botoksi, paralizë, moshapje e syrit dhe hematome janë vetëm disa nga reaksionet që shfaqen.

Këto ndodhin pasi ndërhyrje estetike në fytyrë bëjnë edhe personat që merren me “trajtimin e flokëve” apo edhe të tjerë që nuk kanë njohuri për komplikimet e mundshme që mund t'i shkaktojë botoksi ose filleri, apo mënyra e injektimit të tyre.

Në treg “ka produkte të ndryshme” që përdoren për botoks, të cilat nuk dihet nëse janë të miratuara nga rregullatorët e barnave.

Në rrjetet sociale të qendrave të estetikës dhe të institucioneve private arsimore reklamohen vazhdimisht trajnime për ndërhyrje në fytyrë.

Por gjithashtu shqetëim është edhe mungesa e rregullores për qendra të tilla që kryejnë ndërhyrje pa patur informacionet dhe mjetet e duhura.

Pas ngritjes së këtij shqetësimi nga profesionistët, CNA ka krijuar një sondazh ku pyet qytetarët “Si i vlerësoni ndryshimet estetike në fytyrë?”

Qytetarët kanë mundësinë të shprehin mendimin e tyre duke zgjedhur një nga alternativat :”Pozitive, Shëmtim apo Nuk e di.”

Mund të zgjidhni një nga mundësitë në sondazhin e mëposhtëm./ CNA

Poll