web counter
LEXO PA REKLAMA!

SHKARKO APP

App Store
Google Play

Situata në Qarkun Shkodër drejt normalizimit, nivelet e ujit në rënie

18 Shkurt 2026, 08:58, Aktualitet CNA
Situata në Qarkun Shkodër drejt normalizimit, nivelet e ujit në
Foto ilustruese

Situata e emergjencave civile në territorin e Qarkut Shkodër paraqitet përgjithësisht e qëndrueshme dhe në përmirësim. Sipas informacioneve të raportuara nga bashkitë dhe institucionet përgjegjëse, niveli i ujërave ka shfaqur tendencë rënieje gjatë orëve të fundit.

Në territorin e Shkodrës situata është stabilizuar. Në zonën e Obotit vijon të ketë prezencë uji, kryesisht në sipërfaqe tokash bujqësore, por me tendencë në ulje. Aksi rrugor që lidh fshatin Obot me rrugën kryesore ka një nivel uji prej rreth 40–45 cm. Në zonë janë vendosur mjete me kalueshmëri të lartë, të cilat do të ndërhyjnë sipas nevojës. Deri më tani nuk raportohen banesa të rrethuara nga uji.

Sipas të dhënave nga Drejtoria e Ujitjes dhe Kullimit Lezhë, nivelet e ujit në pikat monitoruese mbeten nën kuotat kritike. Niveli i liqenit është regjistruar në kuotën 7.90 metra, ndërsa niveli i lumit Drin në 7.70 metra, të dyja me tendencë rënieje krahasuar me matjet e mëparshme. Nuk raportohen probleme në kanalet kulluese, argjinaturat mbrojtëse apo në digën e rezervuarit të Shtodrit.

Në aksin rrugor Bogë–Theth reshjet kanë pushuar dhe rruga është pastruar e zgjeruar deri në zonën e Qafë-Thores, pranë tunelit të parë. Strukturat përkatëse mbeten në gatishmëri për çdo ndërhyrje të mundshme.

Ndërkohë, në bashkitë Vau i Dejës, Malësi e Madhe, Pukë dhe Fushë-Arrëz situata paraqitet e qëndrueshme dhe nën kontroll, pa raportime për emergjenca.

Institucioni i Prefektit të Qarkut Shkodër, në bashkëpunim me strukturat përgjegjëse, vijon monitorimin në terren për të garantuar reagim të shpejtë në rast nevoje./ CNA





Lajmet e fundit nga