web counter
LEXO PA REKLAMA!

SHKARKO APP

App Store
Google Play

“Siguria globale e paqëndrueshme”/ Begaj: Duhet të jemi të gatshëm të mbrojmë veten

4 Mars 2024, 11:22, Aktualitet CNA
“Siguria globale e paqëndrueshme”/ Begaj: Duhet të jemi
Presidenti Bajram Begaj

Presidenti Bajram Begaj tha gjatë ceremonisë së inaugurimit të bazës ajrore në Kuçovë se siguria globale është e paqëndrushme.

Kreu i shtetit përmendi agresionin rus ndaj Ukrainës dhe sulmin terrorist në Banjskë të Kosovës si dy raste që tregojnë brishtësinë e sigurisë.

Për këtë arsye, Begaj theksoi se duhet të jemi gjithmonë të gatshëm për të mbrojtur veten, dhe për të kontribuar në NATO.

“NATO, nëpërmjet këtij investimi, tregon se Shqipëria ka një rëndësi strategjike për Aleancën. Është një investim për të forcuar kapacitetet, planet, burimet dhe infrastrukturën e Aleancës. Për Shqipërinë dhe Forcat tona të Armatosura, një investim strategjik në fushën e sigurisë dhe të mbrojtjes, shumë i nevojshëm dhe i mirëpritur ndër vite.

Ky investim merr një rëndësi të veçantë sidomos më kushtet kur siguria në hapësirën euroatlantike është e rrezikuar. Agresioni i paprovokuar i Rusisë ndaj Ukrainës, situata në Lindjen e Mesme dhe në rajone të tjera, terrorizmi, si dhe kërcënime të tjera përbëjnë sfida për interesat dhe vlerat që përfaqëson bashkësia euroatlantike.

Konfrontimet politiko-ushtarake rrezikojnë të përshkallëzohen dhe të përhapen. Kjo u pa më së miri shtatorin e kaluar në sulmin terrorist të Banjskës, në Kosovë. Ai sulm tregoi se sa e brishtë është siguria në rajonin tonë dhe dëshmoi se ka ende aktorë lokalë, të cilët mundohen ta projektojnë të ardhmen nëpërmjet një të kaluare, e cila nuk duhet të kthehet më.

Në këtë situatë sigurie globale të paqëndrueshme, ne duhet të jemi gjithmonë të gatshëm për të mbrojtur veten, dhe për të kontribuuar në Aleancë për garantimin e paqes, sigurisë, dhe stabilitetit”, theksoi Presidenti./ CNA





Lajmet e fundit nga