web counter
LEXO PA REKLAMA!

SHKARKO APP

App Store
Google Play

E fundit!

x

Shqiptarët duan mbledhje!/ Sondazhi i "Monitor", 38% e votuesve mendojnë se ato duhet të jenë të rregullta

14 Mars 2024, 08:04, Aktualitet CNA
Shqiptarët duan mbledhje!/ Sondazhi i "Monitor", 38% e votuesve
Foto ilustruese

Punonjësit zakonisht i shohin mbledhjet e shpeshta dhe të gjata si të panevojshme dhe shprehje e burokratizimit të tepërt të proceseve të punës.

Megjithatë, një sondazh i zhvilluar në faqen e internetit dhe rrjetet sociale të “Monitor”, tregoi se, në fakt, shumica e votuesve nuk i perceptojnë si problem mbledhjet në punë.

Sipas rezultateve të sondazhit, 38% e votuesve shprehen se mbledhjet në punë duhet të jenë të rregullta.

34% e votuesve në sondazh nuk janë kundër mbledhjeve, por mendojnë se ato duhet të jenë të shkurtra. Vetëm 21% e votuesve në sondazh mendojnë se mbledhjet në punë zakonisht janë të panevojshme. Një pakicë prej 7% e votuesve mendojnë se mbledhjet në punë duhet të jenë të rralla.

Megjithatë, rezultatet e sondazhit tentojnë të jenë të ndryshme në varësi të kanalit të komunikimit dhe llojit të audiencës. Në sondazhin e zhvilluar në faqen e internetit, monitor.al, afërsisht 37% e votuesve mendojnë se mbledhjet duhet të jenë të rregullta, ndërsa 27% e tyre mendojnë se mbledhjet janë zakonisht të panevojshme.

Në sondazhin e zhvilluar në Linkedin, alternativa se mbledhjet duhet të jenë të rregullta arrin në 39%, ndërsa vetëm 15% e votuesve shprehen se mbledhjet zakonisht janë të panevojshme. Alternativa më e votuar në sondazhin në Linkedin është ajo se mbledhjet duhet të jenë të shkurtra, nga 40% e pjesëmarrësve. Pra, mes një segmenti më të specializuar të audiencës, problemi duket të jetë sidomos fakti se mbledhjet janë më të gjata nga ç’duhet.

Perceptimi lidhur me mbledhjet brenda kompanive mund të jetë i ndryshëm, edhe në varësi të shkallës së hierarkisë. Për drejtuesit mbledhjet mund të perceptohen si një mënyrë më efektive për të mbledhur informacion, për të këmbyer mendime, për të zgjidhur problemet, për të marrë vendime apo për të rritur trysninë mbi punonjësit për të arritur objektivat.

Nga ana tjetër, shpesh punonjësit i perceptojnë mbledhjet si humbje kohe për çështje që mund të ndiqen me mënyra më pak formale komunikimi apo diskutimi, ndërkohë që koha e shpenzuar në mbledhje mund të shfrytëzohet në mënyrë më produktive.

Shpeshtësia dhe efikasiteti i mbledhjeve në funksion të një vendimmarrjeje më të mirë është shpesh objekt i diskutimeve kur bëhet fjalë për menaxhimin e kompanive.

Sipas një sondazhi të zhvilluar nga kompania e specializuar e konsulencës McKinsey, 61% e drejtuesve u shprehën se thanë se të paktën gjysma e kohës që ata shpenzuan për të marrë vendime (pjesa më e madhe e shpenzuar në mbledhje) ishte joefektive. Një sondazh tjetër tregoi se 80% drejtuesve po shqyrtonin ose po zbatonin tashmë ndryshime në strukturën dhe ritmin e mbledhjeve, në përgjigje të ndryshimeve që solli pandemia në mënyrën e të punuarit.

Kur mbledhjet nuk zhvillohen mirë, ose kur zhvillohen shumë të tillë, vendimmarrja bëhet më e ngadaltë dhe cilësia e vendimeve të marra vuan nga kjo.

Rrallëherë, sipas analizës McKinsey-t, menaxherët e shohin problemin real, që duket të jetë organizimi dhe ekzekutimi i dobët i ndërveprimit në kompani, ose, e thënë me fjalë të thjeshta, mbledhjet joefektive./ Revista Monitor





Lajmet e fundit nga