Reshjet e dëborës në Korçë rrezikojnë sektorin bujqësor/ Çfarë sugjerojnë specialistët e fushës

19 Mars 2025, 11:08, Sociale CNA

Reshjet e dëborës në Korçë rrezikojnë sektorin

Reshjet e dëborës të rëna ditën e djeshme në Korçë, të shoqëruara me ulje të ndjeshme të temperaturave, kanë ndikuar në sektorin bujqësor, veçanërisht në kulturat bujqësore.

Sipas Arben Hysollit, specialist pranë Drejtorisë së Bujqësisë në Korçë, dëmet e shkaktuara varen nga disa faktorë kryesorë.

Reshjet e dëborës në Korçë rrezikojnë sektorin

Ndër kulturat më të rrezikuara në këto kushte janë bajamja, pjeshka, kajsia dhe qershia, veçanërisht kultivarët e hershëm të qershisë, të cilët mund të pësojnë dëmtime serioze. Aktualisht, po monitorohet situata dhe pritet një vlerësim i saktë i dëmeve brenda 72 orëve të ardhshme.

Reshjet e dëborës në Korçë rrezikojnë sektorin

"Reshjet e dëborës të rëna ditën e djeshme u shoqëruan edhe me ulje të temperaturave të cilat arritën deri në -5.2/ -6 gradë Celsius. Dëmet e shkaktuara nga ulja e temperaturave varen nga një sërë faktorësh të cilat janë zgjatja e temperaturës minimale, sa ka arritur kjo temperaturë minimale, varet nga specia apo kultivari i kulturës bujqësore, si dhe nga faza fenologjike ku ndodhet kultura bujqësore.

Sa më sipër, më të rrezikuara në këto kushte moti të ngricave janë kulturat bërthëmore, sikurse është bajamja, pjeshka, kajsia, qershia, flasim për kultivarët e hershëm të qershisë të cilat rrezikojnë më shumë për dëmtim serioz. Ne jemi në monitorim të situatës dhe për një vlerësim dëmi do të na duhet rreth 72 orë për të përcaktuar saktësisht shkallën e dëmit në këto kultura bujqësore",-tha Hysolli.

Reshjet e dëborës në Korçë rrezikojnë sektorin

Nga ana tjetër, moti ekstrem po bëhet gjithnjë e më i shpeshtë si pasojë e ndryshimeve klimatike dhe ngrohjes globale, duke i gjetur fermerët shpesh të papërgatitur për situata të tilla. Në këto raste, si masë parandaluese rekomandohet krijimi i mjegullës së tymit për të ngritur temperaturën në zona të caktuara.

Një tjetër metodë e përdorur është edhe përdorimi i pompave centrifugale, të cilat krijojnë rryma ajri dhe mund të ndihmojnë në rritjen e temperaturës, duke mbrojtur kulturat bujqësore nga dëmtimet e ngricës.

Reshjet e dëborës në Korçë rrezikojnë sektorin

"Me thënë të vërtetën, në rastet e kushteve ekstreme të motit, janë shpeshtuar, është rritur frekuenca e ngjarjeve ekstreme të motit si shkak i ngrohjes globale. Duke qenë kështu, fermerët ndodhen herë pas here të papërgatitur nga këto situata, por në aspektin e këshillave teknike, në momentin që flasim, janë ndezja e zjarreve duke krijuar tymnaja mjegulle, me mjete rrethanore që mund të kenë fermerët si kashta e lagur, kartoni i lagur, shkarpa, mjete rrethanore për të krijuar këtë mjegull tymi. Këtu mund të përdoren dhe pompat centrifugale të cilat krijojnë rryma ajri, të cilat bëjnë deri në 3 gradë rregullim të temperaturës",-tha Hysolli.

Pas verifikimeve, në ditët në vijim në juglindje do të përcaktohet shkalla e dëmit dhe fshatrat konkrete në të cilat është krijuar kjo situatë për fermerët./CNA