Reagon Veliaj: SPAK nxorri informacione

22 Korrik 2025, 17:21, Aktualitet CNA

Kryebashkiaku i arrestuar i Tiranës, Erion Veliaj ka reaguar sërish me tezat e tij të vazhdueshme, sipas të cilave ka rrjedhje informacioni nga SPAK.

Reagimi i sotëm i Veliajt:

“Jemi thellësisht të shqetësuar që, praktika e nxjerrjes së informacioneve mbi procedurat e çështjes penale të z. Veliaj, vijon edhe në rrethanat e një takimi të prezumuar që do të mbahet nesër mes avokatëve të tij dhe SPAK-ut. Njoftimi i medias apo marrja e informacionit nga ana e medias përpara se vetë personit nën hetim, z. Veliaj, është një provë tjetër e faktit që kjo është një taktikë jo ligjore e prokurorisë për të sugjeruar në publik fajësinë e z. Veliaj.
Zbulimi i përsëritur dhe i paligjshëm i informacioneve që përbëjnë sekret hetimor mbi çështjen e z. Veliaj ka vijuar pa ndërprerje që nga dita e arrestimit të tij, në një përpjekje të qëllimshme për ta paragjykuar. Mosfillimi i asnjë procedimi penal nga ana e Prokurorisë së Posaçme për kryerjen e veprës penale të parashikuar nga neni 295/a (“Zbulimi i akteve ose dhe të dhënave sekrete”) i Kodit Penal, tregon qartë bashkëpunimin e këtij organi në realizimin e kësaj vepre penale.
Siç jemi njohur nga mediat e “SPAK”, që nesër pritet njoftimi i akuzës dhe përfundimi i hetimit nga SPAK, 163 ditë pas arrestimit të z. Veliaj, i jep për herë të parë mundësinë të shqyrtojë dhe të sfidojë siç duhet akuzat që janë ngritur ndaj tij, të analizojë provat e prokurorisë, të paraqesë prova dhe argumente ligjore në mbrojtje të tij.
Z. Veliaj kundërshton me forcë çdo akuzë për shkelje dhe vijon të theksojë bindjen e tij se ndalimi i zgjatur, i paarsyeshëm, i panevojshëm dhe joproporcional është në dëm të rëndë jo vetëm të të drejtave të tij kushtetuese si qytetar i këtij vendi, por edhe në dëm të rëndë të qytetarëve të Tiranës që kanë zgjedhur qeverisjen e qytetit dhe të vetë qytetit të Tiranës, që ka nevojën imediate të qeveriset nga kryetari i zgjedhur.”

Por, në fakt, në gjithë këtë reagim që bën Veliaj, e vërteta është krejt tjetër. Sot në SPAK, është parë nga gazetarët dhe është konfirmuar nga burime të palëve që ndodhen në gjyq se janë njoftuar për akuzë.

Pra, janë thirrur përfaqësues ligjorë të subjekteve dhe individëve të tjerë të përfshirë në këtë hetim.

Dhe sërish nuk është SPAK që ka nxjerrë informacione.

Mirë është që Veliaj që këto informacione apo studiot e tij ligjore t’i gjejnë rreth e rrotull, afër vetes. Do të ishte më e thjeshtë se të të akuzojnë institucionet për të gjetur fakte apo prova për t’i përdorur më tej gjatë procedurave të tyre ligjore.

E vërteta është një dhe vetëm një; në datën 24 përfundon afati hetimor gjashtë mujor ndaj Veliajt.

Është e ditur botërisht që më datë 24 mbaronte afati 6-mujor.

Dy do ishin mënyrat: ose Veliajt do t’i njoftohej akuza ose do të kërkohej shtyrja e afateve hetimore. Nga ajo që u mësua sot nga avokatët e shumë subjekteve që u paraqiten në SPAK.

E vërteta është se nesër pritet të vërtetohen akuzat, afati mbaron më datë 24 dhe këtu nuk duket të ketë ndonjë dalje informacioni apo rrjedhje të dhënash siç pretendon Veliaj.

Gjithçka duket korrekte, një raportim serioz me burime nga gazetarët dhe fundja, gazetarët këtë punë kanë, të mbledhin informacione, t’i publikojnë dhe ta bëjnë sa më mirë detyrën e tyre, jo të heshtin se kështu i pëlqejnë kryebashkiakut të Tiranës se kështu i pëlqejnë alibitë e tyre ligjore./CNA