E fundit!

09:49 Kosova & Bota

Kurti: Kosova nuk kishte nevojë për këto zgjedhje, rezultati e dëshmoi qartë

Kryeministri në detyrë i Kosovës, Albin Kurti u shpreh në ...

"Rama po shkatërron ëndrrën europiane"/ Berisha te Foltorja: 12 marsi, dita e pranverës së demokracisë

9 Mars 2026, 19:02, Aktualitet CNA

Foltorja e radhës e opozitës është mbajtur mbrëmjen e sotme para Kryeministrisë. Kryetari i Partisë Demokratike, Sali Berisha gjatë fjalës së tij, komentoi qëndrimin e PS-së për çështjen e imunitetit të Belinda Ballukut, ku tha se mazhoranca po përdoret për të mbuluar vjedhjet e kryeministrit Edi Rama.

Ky i fundit, sipas kryedemokratit, po mbyll dyert e Europës për shqiptarët dhe po shkatërron ëndrrën europiane. Më tej ai bëri thirrje çdo profesionisti dhe të rinjve në vend të ngrihen dhe të protestojnë kundër kësaj qeverie.

“Ky është sheshi i lirisë dhe qytetarëve. Ky shesh do të shënojë fundin e regjimit armiqësor ndaj qytetarëve. Zhvillimet e këtyre muajve nxorrën në pah shëmtinë më të madhe të këtij regjimi të cilët shumë prej jush e kanë denoncuar. Sot deputetët socialist përdorën Ballukun për të mbrojtur vjedhjet e Ramës. Në këtë kuadër unë kam një thirrje të veçantë fillmisht për çdo intelektual shqiptar, të mos harrojë kurrë se investimi që kanë bërë për shkollimin e tij ka qenë që ai të jetë pavarësisht profesionit, të jetë avokat i pamposhtur i intersave të kombit dhe shoqërisë së tij. U drejtohem mësusve, mjekëve, inxhinierëve, juristëve. Konformizmi me këtë regjim është mëkati më i madh. Asnjë prej jush nuk mund të thotë se nuk e kuptoj se ç’po ndodh.

Rama po përdor mazhorancën për të mbrojtur vjedhjet që ju ka bërë qytetarëve. Ju e keni të qartë se me këto akte, Edi Rama po mbyll dyert e Europës për shqiptarët, por shkatërron ëndrrën europiane. Asnjë nuk mund të thotë se nuk e kupton se kur shkelet Kushtetuta, kur drejtësia asgjësohet, nuk ka më shtet. Nuk ka më ecje para. Mos harroni se heshtja juaj është mbështetje e fuqishme për kreun e kësaj organizate që të vazhdojë rrënimin e shkollave tona, arsimit, që të vazhdojë spastrimin etnik të intelektualëve, rrënimin e spitaleve tona, shkatërrimin e sistemit të shëndetësisë. Qëndrimi në pushtet i tij ndihmohet më së shumti nga heshtja juaj. Ata që kanë përjetuar diktaturën se cila ishte përgjegjësia për konformizmin ndaj saj.

Kam bërë një thirrje për të rinjtë. Vendi juaj sot ka nevojë më shumë se kurrë për guximin dhe energjinë tuaj, që ju të ndërtoni këtu ëndrrën tuaj dhe jo të merrni rrugët e botës. Ndaj dhe dilni në shesh. Kjo qeveri duhet fshirë një orë e më parë. Ju bëj thirrje dhe policëve dhe administratës mos e mbështesni por sabotojeni çdo ditë këtë regjim", tha Berisha.

Ndër të tjera kryedemokrati e cilësoi 12 marsin, ditën e protestës tjetër kombëtare të opozitës, si “dita e pranverës së demokracisë”.

12 marsi është një ditë e madhe. Në 12 mars të gjithë para parlament. 12 marsi është dita e pranverës së demokracisë. 12 marsi është dita e përmbysjes së regjimit. Ndaj në orën 10:00 më 12 t’i japim përgjigjen e merituar Edi Ramës”, tha Berisha. /CNA