E fundit!

18:12 Aktualitet

Nis protesta e pestë e qytetarëve në Tiranë

Mbahet ditën e sotme protesta e radhës e qytetarëve në Tir...

Raporti i SPAK-ut për 2025/ 45.4 milionë euro asete të sekuestruara dhe konfiskuara

9 Mars 2026, 13:36, Aktualitet CNA

Raporti i SPAK-ut për 2025/ 45.4 milionë euro asete të

Është publikuar raporti i SPAK-ut për vitin 2025. Gjatë këtij viti SPAK-u ka vijuar zbatimin e strategjisë institucionale në luftën kundër krimit të organizuar, korrupsionit dhe pastrimit të parave, duke miratuar dokumente strategjikë si: Strategjinë për uljen e Numrit të Çështjeve të Prapambetura, Strategjinë e Komunikimit 2025- 2028, si dhe akte nënligjore si: Rregullorja për Përcaktimin e Procedurave të Përzgjedhjes së Drejtorit të Byrosë Kombëtare të Hetimit.

Gjithashtu, janë hartuar dhe priten të përfundojnë në vitin 2026 akte nënligjore si: Udhëzimi për qarkullimin e brendshëm të dosjeve, Protokolli për komunikimin gjatë krizave, Udhëzimi mbi masat për financimin e terrorizmit sipas rekomandimeve të MONEYVAL, si dhe Rregullorja për mbrojtjen e të dhënave personale.

SPAK ka vijuar të ketë në vëmendje, krahas hetimit penal edhe hetimin pasuror dhe financiar. Në këtë kontekst, është forcuar Sektori i Hetimit Financiar përmes ngritjes së kapaciteteve njerëzore kryesisht në hetimet financiare dhe pasurore me veprime komplekse brenda dhe jashtë vendit ku përfshihen edhe hetimet që përfshijnë kriptovaluta.

Gjatë vitit 2025, vlera totale e aseteve të sekuestruara dhe konfiskuara është rreth 45.4 milionë euro, prej të cilave rreth 43.49 milionë euro, është vlera e aseteve të sekuestruara (rreth 96% e totalit) dhe rreth 1.91 milionë euro përfaqësojnë vlerën e aseteve të konfiskuara (rreth 4% e totalit).

Në vlerën e aseteve të sekuestruara përfshihet dhe sekuestrimi i kriptovalutave të llojit TETHER, USDT, me vlerë ekuivalente prej 14.5 milionë dollarësh ose rreth 12.4 milionë euro (vendimi nr.583, datë 04.09.2025).

Vlera e pasurive të sekuestruara për vepra penale që lidhen me krimin e organizuar është rreth 42.4 milionë euro, ndërkohë që vlera e pasurive të konfiskuara për këtë kategori veprash penale është rreth 1.8 milionë euro. Sa u përket çështjeve që lidhen me zyrtarët e lartë, vlera e pasurive të sekuestruara është rreth 1.1 milionë euro, ndërkohë që vlera e pasurive të konfiskuara është rreth 100,000 euro./ CNA