Qeveria vendos rregullat e reja për plazhet/ Çmimet maksimale dhe stacionet private nën kontroll

28 Janar 2026, 20:39, Aktualitet CNA

Qeveria vendos rregullat e reja për plazhet/ Çmimet maksimale dhe

Foto ilustruese

Një ndryshim i madh po prek këtë sezon turistik. Këshilli i Ministrave ka miratuar ndryshime të rëndësishme në rregulloren e stacioneve të plazhit, duke rregulluar çmimet, kontrollin e hapësirave publike dhe rolin e njësive vendore.

Plazhet publike të tarifuara nga njësitë e vetëqeverisjes vendore tani janë të regjistruara si një kategori e veçantë dhe nuk mund të delegohen te subjektet private. Çmimet maksimale për përdorimin e çadrave dhe shezlongëve do të përcaktohen nga bashkitë, duke u bërë kufi i detyrueshëm për subjektet private.

Ndryshimet prekin edhe stacionet pranë strukturave akomoduese, lumenjtë dhe liqenet, ndërsa niveli i zhurmave dhe higjiena e plazheve do të monitorohen më rreptësisht.

Komiteti i Menaxhimit të Sezonit Turistik, i kryesuar nga ministri për turizmin, do të koordinojë me agjencitë rajonale dhe strukturat inspektuese, duke u siguruar që çdo plazh të funksionojë sipas rregullave të reja.

Vendimi hyn në fuqi pas botimit në “Fletoren Zyrtare” dhe do të jetë vendimtar për sezonin veror, duke garantuar rend, siguri dhe çmime të kontrolluara për pushuesit.

“1. Këshilli bashkiak, përpara fillimit të çdo sezoni turistik, mund të miratojë me vendim çmimet maksimale për secilën zonë bregdetare në territorin e njësisë së vetëqeverisjes vendore, të cilat shërbejnë si kufi maksimal për negociimin dhe zbatimin e çmimeve nga subjektet private.

Në mungesë të këtij vendimi, çmimi maksimal përcaktohet ndërmjet bashkisë dhe subjektit privat, në përputhje me parimet e konkurrencës, proporcionalitetit dhe interesit publik.

2. Çmimet maksimale përcaktohen në mënyrë të diferencuar sipas zonave, duke marrë në konsideratë nivelin e zhvillimit turistik, aksesueshmërinë, intensitetin e kërkesës, standardin e shërbimit dhe interesin publik.

3. Çmimet maksimale të dakordësuara bëhen pjesë përbërëse dhe detyruese e kontratës së nënshkruar ndërmjet njësisë së vetëqeverisjes vendore, Agjencisë Kombëtare të Bregdetit dhe subjektit privat e nuk mund të tejkalohen gjatë gjithë periudhës së vlefshmërisë së kontratës.

4. Tejkalimi i çmimeve maksimale përbën shkelje kontraktore dhe shkak për vendosjen e masave administrative dhe/ose zgjidhjen e kontratës.”.

Respektimi i kushtit për nivelin e lejuar të zhurmave

1. Çdo stacion plazhi është i detyruar të respektojë nivelin kufi të zhurmave të parashikuara në aktet ligjore dhe nënligjore në fuqi për zhurmat, si dhe/ose në planet vendore të miratuara nga organet e vetëqeverisjes vendore.

2. Njësia e vetëqeverisjes vendore, para fillimit të sezonit turistik veror, publikon planin e detajuar vendor mbi nivelin e zhurmave për secilin plazh, i detyruar për zbatim për secilin subjekt në zonën bregujore.

3. Agjencia Kombëtare e Bregdetit, si dhe agjencitë rajonale të bregdetit raportojnë çdo ankesë/raportim të paraqitur pranë saj në Policinë e Shtetit, në Policinë Bashkiake, në NJVV-në, në Agjencinë Kombëtare të Mjedisit, si dhe në çdo institucion tjetër kompetent për monitorimin e nivelit të zhurmave”, theksohet ndër të tjera në vendim qeverie./ CNA

Qeveria vendos rregullat e reja për plazhet/ Çmimet maksimale dhe