Protestë para Bashkisë së Korçës/ Juglindja kërkon zgjidhje pas bllokimit të rrugës

28 Shkurt 2026, 21:26, Aktualitet CNA

Më 2 mars, në orën 17:00, përpara Bashkisë së Korçës, banorët e Juglindjes janë thirrur të marrin pjesë në një protestë paqësore.

Protesta është thirrur nga përfaqësues të shoqërisë civile, pas bllokimit të aksit Librazhd-Prrenjas, që prej ditësh ka izoluar zonën.

Bllokimi i aksit ka sjellë vështirësi në përditshmërinë e përdoruesve të këtij segmenti dhe banorëve të Juglindjes.

Shembja e aksit rrugor Librazhd–Prrenjas ka shkaktuar vështirësi të mëdha në qarkullim, dhe ka ndikuar në jetën ekonomike dhe sociale të banorëve të Juglindjes.

Për shkak të shembjes së aksit, situata ka sjellë devijime të gjata, kosto shtesë për transportin dhe vonesa në lëvizjen e qytetarëve dhe mallrave.

Pandi Dhimitri, një nga përfaqësuesit e shoqatës civile, falënderoi të gjithë ata që kanë firmosur peticionin dhe kanë mbështetur protestën.

“Protesta buron nga shqetësimi ynë i përbashkët për situatën e rrugës, e cila na prek të gjithëve njësoj. Kjo është një nismë tërësisht qytetare dhe nuk i përket asnjë subjekti politik. Nuk do të lejojmë përdorimin e saj për qëllime partiake”, u shpreh ai.

Shoqëria Civile thekson se qytetarët janë të lirë të shprehin shqetësimet e tyre, ndërsa qëllimi kryesor është ruajtja e një proteste të qetë dhe dinjitoze.

Ata kanë bërë thirrje për pjesëmarrje masive nën moton: “Le të bëhemi bashkë për të kërkuar një të drejtë legjitime”.

Shembja e rrugës ka shkaktuar reagime dhe debate publike, si dhe akuza mes institucioneve përgjegjëse për mirëmbajtjen dhe sigurinë e infrastrukturës.

Banorët kërkojnë një zgjidhje të shpejtë dhe ndërhyrje konkrete për rikthimin e normalitetit në qarkullim, duke theksuar se izolimi i zonës nuk mund të zgjasë më tej.

Protesta e 2 marsit do të shërbejë si një mesazh i qartë ndaj autoriteteve për të marrë masa urgjente dhe për të ofruar një plan të qartë zgjidhjeje për situatën e krijuar./ CNA

Protestë para Bashkisë së Korçës/ Juglindja