Pezullohen nga puna 4 efektivë në Korçë/ Fusnin nga Kapshtica makina të vjedhura në Greqi

21 Janar 2024, 09:36, Aktualitet CNA

Pezullohen nga puna 4 efektivë në Korçë/ Fusnin nga

Agjencia e Mbikëqyrjes Policore ka pezulluar nga detyra 4 punonjës të policisë të pikën kufitare të Kapshticës dhe komisariatit të Korçës. Punonjësit e policisë akuzohen për "shpërdorim detyre".

Nga hetimet rezultoi se shtetasi M.C. ka trafikuar në Shqipëri automjete që rezultojnë të vjedhura në Greqi, duke u bërë ndryshime në elementët identifikues për t’i pajisur më pas me dokumente false, me qëllim shitjen në vendin tonë. 32-vjeçari është arrestuar nga Policia.

Po kështu është arritur të dokumentohet me prova e fakte ligjore se punonjësit e Policisë, në shpërdorim të detyrës nuk kanë kryer verifikime mbi dokumentacionet e mjeteve, mungesat e prokurave apo autorizimet në momentin që mjetet kanë kaluar në këtë pikë doganore.

Policia ka sekuestruar 6 automjete të dyshuara të vjedhura, me vlerë 130 000 euro.

Njoftimi i AMP-së:

Agjencia e Mbikëqyrjes Policore (Rajoni Elbasan-Korçë) ka ekzekutuar urdhërin e Prokurorisë për ekzekutimin e vendimit të Giykatës së Shkallës së Parë të Juridiksionit të Përgiithshëm Korçë, e cila ka vendosur masën e sigurisë "Arrest në burg" për shtetasin M.C., 32 vjeç, si i dyshuar për kryerjen e veprës penale "Trafikimi i mjeteve motorike".

AMP ekzekutoi gjithashtu vendimin e Gjykatës, për masën e sigurisë "Pezullimi i ushtrimit të një detyre a shërbimi publik", si persona të dyshuar për kryerjen e veprës penale "Shpërdorimi i detyrës" ndaj 4 punonjësve të policisë:

- Inspektor M.M., 32 vjeç, me detyrë punonjës policie pranë PKK Kapshticë;
- Inspektor S.L., 56 vjeç, me detyrë punonjës policie pranë PKK Kapshticë;
- Inspektor E.M., 35 vjeç, me detyrë punonjës policie pranë PKK Kapshticë;
- Nënkomisar M.A., 28 vjeç, me detyrë Specialist për hetimin e krimeve në Komisariatin e Policisë Korçë.

Nga hetimet e kryera me metoda proaktive në lidhje me këtë procedim penal, ka rezultuar se shtetasi M.C. ka trafikuar në Shqipëri automjete që rezutojnë të vjedhura në Greqi, duke iu bërë ndryshime në elementët identifikuese për t’i pajisur më pas me dokumente false, me qëllim shitjen në vendin tonë. Po kështu është arritur të dokumentohet me prova e fakte ligjore se punonjësit e Policisë, në shpërdorim të detyrës dhe në kundërshtim me aktet ligjore dhe nënligjore në fuqi, si edhe në shkelje të Procedurave Standarde të Punës, nuk kanë kryer verifikime mbi dokumentacionet e mjeteve, mungesat e prokurave apo autorizimet që duhet të dispononte shtetasi M.C. në momentin e futjes së këtyre mjeteve në territorin shqiptar.

Në cilësinë e provës materiale u sekuestruan 6 automjete të dyshuara të vjedhura, me vlerë 130 000 euro.

Materialet proceduriale i kaluan Prokurorisë Pranë Gykatës së Shkallës së Parë të Juridiksionit të Përgjithshëm Korçë për veprime të mëtejshme.

Hetimet vijojnë për përfshirje të shtetasve apo punonjësve të tjerë të policisë në këtë veprimtari kriminale./CNA