web counter
LEXO PA REKLAMA!

SHKARKO APP

Paditë për Carlo Bollino-n/ Noka pyet Dumanin, prokurori: Janë çështje hetimi

15 Korrik 2024, 15:41, Aktualitet CNA
Paditë për Carlo Bollino-n/ Noka pyet Dumanin, prokurori: Janë
Altin Dumani, kreu i SPAK-ut

Sot, kreu i SPAK-ut, Altin Dumani, ka raportuar në Kuvend në lidhje me punën e Prokurorisë që drejton përgjatë vitit 2023.

Deputeti Flamur Noka e ka pyetur Dumanin nëse është regjistruar kallëzimi i tij në lidhje me tokën e përfituar nga Carlo Bollino në të cilën është ndërtuar "Report TV".

Më tej Noka e pyet Dumanin nëse kanë nisur hetime në lidhje me këtë dhe në çfarë faze janë.

Po ashtu Noka e pyeti prokurorin për padinë e dytë ndaj Carlo Bollino-s për një skemë korruptive që sjell përfitime financiare, pasi sipas kallëzimit janë përfituar miliona euro para publike të taksapaguesve shqiptarë dhe këto para në mënyrë të jashtëligjshme kanë ndikuar dhe shërbyer për të financuar ndërtimin e godinës së një televizioni privat siç është "Report TV".

“Z. Dumani, ju raportuat sot për hetimet e ndjekura nga SPAK-u në vitin 2023. SPAK-u, siç dihet, u krijua për të hetuar nivelet e larta të krimit dhe të korrupsionit, por çdo shqiptar e di që nivelet e larta janë Edi Rama dhe Erion Veliaj. Po ju drejtoj disa pyetje, që përbëjnë interes madhor për publikun lidhur me disa kallëzime penale që PD ka referuar tek institucioni që drejtoni prej disa muajsh.

Kam kallëzuar penalisht Edi Ramën, Anila Denajn dhe të famshmin Carlo Bollino për përfitimin e tokës dhe godinës për ndërtimin e 'Report TV', të asaj toke që ka falur familja Begeja për të ndërtuar një shkollë për qytetarët e Tiranës dhe jo për të ndërtuar Carlo.

Pyetja ime është: A është i regjistruar ky kallëzim dhe cila është vepra në të cilën është regjistruar? A po kryhen hetime apo jo dhe në ç’fazë janë ato?

Pyetja tjetër. Disa deputetë të PD-së kanë kallëzuar në një padi të dytë, shtetasin Carlo Bollino, për një skemë korruptive që sjell përfitime financiare, pasi sipas kallëzimit janë përfituar miliona euro para publike të taksapaguesve shqiptarë dhe këto para në mënyrë të jashtëligjshme kanë ndikuar dhe shërbyer për të financuar ndërtimin e godinës së një televizioni privat siç është 'Report TV'.

A është regjistruar kallëzim penal dhe cila është vepra? A kryhen hetime dhe në ç’fazë janë hetimet? Kërkojmë informacion.

Në këto kallëzime, po ju bëj me dije zoti prokuror, kemi nisur një analizë të plotë të fakteve dhe provave që tregojnë të gjithë skemën financiare. Rasti i VKM-së 1 euro është tepër flagrant, pasi jo vetëm Edi Rama ka shkelur ligjin për Carlo-n e tij të dashur, por ka bashkëpunim të fortë me ish-ministren e Financave, Anila Denajn. Aty është falsifikuar një kontratë noteriale, është falsifikuar VKM, zoti prokuror, drejtues i SPAK-ut. Jua kemi dërguar të gjitha shkresat zyrtare dhe unë besoj se do të mjaftonin pak ditë për verifikime dhe në një drejtësi të vërtetë, ata do të ishin sot para drejtësisë, abuzuesit dhe përfituesit."

Dumani i është përgjigjur se për t’u informuar për kallëzimin e bërë mund të bëjë një kërkesë dhe të marrë informacion.

Por Dumani tha se të dyja janë çështje hetimi.

"Z. Noka, lidhur me pyetjen e parë, ju thatë se jeni kallëzues dhe si çdo kallëzues, ka të drejtë për t’u informuar për fatin e kallëzimit të bërë. Jeni i ftuar të bëni një kërkesë për informacion dhe do të merrni të gjithë informacionin e nevojshëm për fatin e kallëzimit tuaj. Nuk mund ta bëj këtu, e para se nuk lejohet të flasim për çështje konkrete dhe e dyta janë çështje hetimi. Edhe për pyetjen e dytë bëj kërkesën për informacion...”, tha Dumani./ CNA





Lajmet e fundit nga