E fundit!

10:16 Politikë

Murrizi paralajmëron Berishën: Koha e këllirave duhet të marrë fund ose do fundoseni

Ish-deputeti i Partisë Demokratike, Myslim Murrizi, ka rea...

Nis puna e komisionit për Reformën Territoriale/ Seancë dëgjimore me përfaqësues të shoqërisë civile

4 Korrik 2022, 10:05, Aktualitet CNA

Nis puna e komisionit për Reformën Territoriale/ Seancë

Komisioni i Reformes Territoriale

Komisioni i Reformës Territoriale është mbledhur paraditen e sotme ku po zhvillon një seancë dëgjimore me përfaqësues të organizatave të shoqërisë civile.

Gjatë fjalës së saj, deputetja e PD-së, Dhurata Çupi, bashkëkryetare për Reformën Territoriale, tha se reforma e vitit 2014 ishte joefikase.

"Fakti që ne i kthehemi reformës territoriale, është pikërisht fakti se ajo reformë e realizuar në 2014, ishte joefikase. Me këtë pyetje duhet ta nisim punën në këtë komision, cilat janë problematikat, pse ka dështuar reforma, pse nuk u arrit ajo që pritej? Cilat janë anët e mira të reformës që mund të ruhet nga reforma e kaluar”, u shpreh Çupi.

Ndërkaq, Albana Dhimitri, Drejtore Ekzekutive në Institutin e Politikave Publike dhe Private, tha se Reforma e vitit 2014 uli pjesëmarrjen e qytetarëve në vendimmarrje.

'Ne kemi pasur mundësi të jemi thuajse në çdo bashki. Kemi pasur një eksperiencë të rëndësishme për të prekur reformën në pikëpamjet politike, qoftë dhe administrative. Efikasiteti i administratës publike, ishin 370 njësi të qeverisjes vendore para 2014-ës. Kemi bërë një studim mbi të ardhurat për kokë nga ndryshimi i hartës territoriale dhe na rezulton që të ardhurat janë shumë më të larta në nivel bashkie se përpara reformës. Sa u takon shërbimeve, ka tregues në rritje. Shpenzimet për investimet janë të rritura me disa fish krahasuar me përpara reformës.

Ana negative ishte ulja e pjesëmarrjes së qytetarëve në vendimmarrje, pra kishte pjesë të popullatës që për shkak të largësisë me njësinë administrative bashki, nuk kishin mundësi fizike për të qenë pjesëmarrës në mbledhjet e zhvilluara apo elementëve të tjerë të përditshmërisë. Ndjesia e të zgjedhurit direkt pra, është ndjesi e humbur. Debati mund të jetë nëse përpara 2014 ishte apo jo efikase zgjedhja direkte, jo! Por të paktën perceptimi se po zgjidheshe, ishte në ndjesinë e komunitetit dhe të zgjedhurit. Barra fiskale e njësive administrative mbetet te pushteti qendror, duke ulur nivelin e përgjegjësisë fiskale të qeverisjes lokale", - u shpreh Dhimitri./E.T-CNA.al