Ngjarja e rëndë në Korçë/ Ministri: Akt i papranueshëm, dhuna në familje nuk mund të injorohet

1 Shtator 2024, 14:40, Aktualitet CNA

Ngjarja e rëndë në Korçë/ Ministri: Akt i

Ministri i Brendshem Ervin Hoxha

Ministri Ervin Hoxha ka reaguar pas ngjarjes së rëndë të ndodhur dje në Korçë, ku bashkëshorti dogji me benzinë gruan e tij.

Hoxha thotë se ky është një akt i papranueshëm dhe se dhuna në familje mbetet ende një problem që nuk mund të injorohet, por kërkon reagim të menjëhershëm nga institucionet dhe shoqëria.

“Ngjarje të tilla janë një shkelje e rëndë e të drejtave të njeriut dhe një apel i fortë për të siguruar mbrojtje më të fuqishme për të gjithë ata që vuajnë nga dhuna në familje, sidomos për të miturit, vajzat dhe grate”, thotë ndër të tjera ministri Hoxha.

“Ngjarja e rëndë e ndodhur dje në Korçë, ku një bashkëshort në proces divorci, tentoi të djegë me benzinë gruan e tij, është një akt i papranueshëm që na kujton se dhuna në familje është ende një problem, që nuk mund të injorohet e që kërkon reagim të menjëhershëm nga institucionet përgjegjëse dhe nga e gjithë shoqëria.

Ngjarje të tilla janë një shkelje e rëndë e të drejtave të njeriut dhe një apel i fortë për të siguruar mbrojtje më të fuqishme për të gjithë ata që vuajnë nga dhuna në familje, sidomos për të miturit, vajzat dhe gratë.

Jam i bindur se për të parandaluar dhe trajtuar raste të tilla nuk mjafton vetëm reagimi i institucioneve përkatëse, por dhe solidariteti e sensibilizimi i shoqërisë sonë, në mënyrë që askush të mos i nënshtrohet një trajtimi të tillë të papranueshëm, si rasti i Korçës.

Ndaj u bëj thirrje qytetarëve të denoncojnë çdo rast të dhunës në familje dhe të bashkëpunojnë me autoritetet, për t’u siguruar që ata, të cilët kryejnë këto akte, të përballen me pasojat e veprimeve të tyre, ashtu siç do të përballet edhe autori i ngjarjes së djeshme!

Si ministër i Brendshëm shpreh mbështetjen time më të madhe për viktimat e dhunës në familje dhe angazhimin tim për të punuar pareshtur për një shoqëri, ku secili të ndihet i sigurt dhe i respektuar.

Duke i uruar shërim sa më të shpejtë zonjës - viktimë e dhunës në familje dje në Korçë - shpreh angazhimin tim për të forcuar mekanizmat e mbrojtjes dhe mbështetjes së duhur për viktimat si ajo, dhe ftoj edhe institucionet e tjera përgjegjëse të veprojnë shpejt e në përputhje me politikat e qeverisë sonë për luftën ndaj dhunës në familje”, shkruan ministri Ervin Hoxha./ CNA