E fundit!

16:40 Aktualitet

Investimi në Zvërnec/ Rama: Ja njeriu që investitorët kanë kontraktuar për arkitekturën e peizazhit

Kryeministri Edi Rama ka zbuluar arkitektin me famë botëro...

Nga "Tempulli" te shkatërrimi i bandës së Laert Haxhiut/ Policia e Shtetit bën bilancin e punës së muajit shtator

1 Tetor 2023, 10:22, Aktualitet CNA

Nga "Tempulli" te shkatërrimi i bandës së Laert

Policia e Shtetit

Policia e Shtetit ka pasqyruar punën e muajit shtator.

Sipas bilancit janë kryer 83 megaoperacione policore, ku janë prangosur 937 autorë të dyshuar krimesh si dhe janë sekuestruar qindra kilogramë drogë.

“Muaj shumë intensiv për Policinë e Shtetit, e cila nëpërmjet betejës frontale me krimin, ka mundur të parandalojë ngjarje kriminale, të zbardhë shumë të tjera të kryera më parë, të garantojë rend dhe siguri publike, si dhe të rritë imazhin e vendit.

83 megaoperacione dhe operacione policore të finalizuara gjatë këtij muaji kanë vënë në pranga 937 autorë të dyshuar krimesh, kanë asgjësuar 60 705 bimë dhe 15 564 fara cannabisi, si dhe kanë sekuestruar 223 kg cannabis, 6 kg kokainë, sasi heroine, 68 kallëpë tritoli, 4 mina me telekomandë, 44 armë zjarri, 43 granata dhe 12 armë gjahu.

Angazhimi i shumëfishuar, nga Vermoshi deri në Konispol, i mijëra efektivëve, mundësoi një sezon veror të sigurtë dhe pa incidente, si dhe reflektoi profesionalizmin dhe humanizmin e punonjësve të Policisë së Shtetit. Vijojmë të jemi të gatshëm për të përmbushur detyrat funksionale ndaj turistëve dhe pushuesve që e zgjedhin vendin tonë gjatë gjithë vitit.

Efektivë policie të mirëtrajnuar janë planëzuar në afërsi të shkollave të vendit dhe së bashku me aktorët e tjerë të zinxhirit të sigurisë në shkolla, janë maksimalisht të angazhuar për të implementuar me rigorozitet Paketën e Sigurisë në këto ambiente.

Eksperienca e fituar për organizimin e aktiviteteve ndërkombëtare u pasqyrua në masat e ndërmarra për mbarëvajtjen e ndeshjes Shqipëri-Poloni. Planëzimi i efektivëve, koordinimi i punës dhe levizjeve në kryeqytet, si dhe qytetaria e treguar ndikuan pozitivisht në standardet e sigurisë që vendi ynë ka afirmuar tashmë edhe ndërkombëtarisht.

Gjithashtu, efektivë të Policisë së Kukësit janë angazhuar maksimalisht për të garantuar mbarëvajtjen e zgjedhjeve bashkiake që u zhvilluan në këtë qark, gjatë këtij muaji.

Për sa i përket misionit parësor të Policisë, sigurisë së qytetarëve, gjatë këtij muaji janë finalizuar megaoperacione me impakt të lartë publik”, bën me dije policia.

Më tej ka evdientuar disa prej megaoperacioneve që ka kryer gjatë muajit shtator ku ka veçuar “Tempullin” dhe megaoperacion “Never Forget”.

Gjatë operacionit "Never Forget" janë zbardhur disa ngjarje kriminale brenda dhe jashtë vendit. Janë identifikuar 16 anëtarët e bandës së Laert Haxhiut, ku për 12 prej tyre janë dhënë urdhra ndalimi.

Ndërsa nga megaoperacioni "Tempulli", u arrestuan 260 persona që merreshin me prodhimin dhe shpërndarjen e drogës.

“Megaoperacioni policor i koduar “NEVER FORGET” bëri të mundur zbardhjen e disa ngjarjeve kriminale kundër personit e pronës, të ndodhura më parë, brenda dhe jashtë vendit (6 vrasje, 5 shkatërrime me eksploziv të pronës, 2 vjedhje me dhunë, 3 sigurime të kushteve/mjeteve për të kryer vrasje dhe 1 kanosje të punonjësve të Policisë). Profesionalizmi dhe konspiracioni i specialistëve të strukturave hetimore dhe operacionale të Policisë së Shtetit, si dhe të grupeve hetimore të Prokurorisë, mundësuan identifikimin e 16 autorëve të këtyre rasteve (shtetas me rrezikshmëri të lartë shoqërore), si dhe ekzekutimin e 12 urdhrave për ndalimin e tyre.

Megaoperacioni policor mbarëkombëtar i koduar “Tempulli” çrrënjosi në 12 qarqet e vendit, veprimtarinë kriminale të shpërndarjes së drogave të ndryshme te nxënësit, të rinjtë dhe grupmosha të tjera. Megaoperacioni, në konspiracion të plotë, arriti të vejë në pranga 260 shtetas (organizatorë grupesh kriminale, shpërndarës dhe tregtues të lëndëve narkotike) dhe të sekuestrojë qindra kilogramë cannabis, si dhe heroinë, kokainë, droga të tjera të reja në vendin tonë, armë zjarri, qindra automjete dhe celularë nëpëmjet të cilëve koordinohej dhe kryhej shpërndarja, si dhe shuma të konsiderueshme parash të fituara nga veprimtaritë kriminale.

Megaoperacionet “Obelisk” dhe “Knock out 3”, të finalizuara në Vlorë, parandaluan ngjarje të rënda kriminale kundër personit, të cilat do të kryheshin nga grupe kriminale, me përdorimin e minave ose armëve të zjarrit. 7 shtetas u vunë në pranga për të dyja megaoperacionet. Minat dhe armët e zjarrit u sekuestruan nga Policia”, vijon më tej Policia e Shtetit me bilancin.

Gjatë muajit shtator janë shkatërruar 4 grupe kriminale që shpërndanin drogë drejt vendeve fqinje.

Gjithashtu janë gjetur arsenal armësh në Selenicë, Shkodër, Durrës dhe Elbasan.

“4 grupe të tjera kriminale që shpërndanin, shitnin ose trafikonin droga të ndryshme (drejt RMV-së ose Greqisë), u goditën në Korçë, Fier, Tiranë dhe Himarë, si rezultat i operacioneve "Restart 16", “Vakumi”, “Kodra e diellit 3” dhe “ION”. 16 anëtarë (shqiptarë dhe të huaj) të këtyre grupeve kriminale, u vunë në pranga. Cannabis, kokainë, ekstazi, MDMA dhe para të përfituara nga kjo veprimtari kriminale, u sekuestruan nga Policia.

Në vijim, strukturat në qarqe finalizuan 12 operacione të tjera antidrogë dhe 20 operacione kundër kultivimit të kanabisit.

4 arsenalë armësh, sasi të mëdha municioni luftarak, jelekë antiplumb dhe veshje kamuflazhi, u gjetën dhe u sekuestruan nga Policia, në Selenicë, si dhe në Shkodër, Durrës dhe në Elbasan (si rezultat i operacioneve “Konglomerat”, “Types” dhe “Brothers”). 5 shtetas u vunë në pranga për posedim të armëve, për qëllime kriminale.

Në vijim, strukturat në qarqe finalizuan 15 operacione të tjera kundër mbajtjes pa leje të armëve të zjarrit.

Rreth 445 000 euro, si dhe mallra (veshje, produkte kozmetike, ora të markave të shtrenjta, aksesorë diamanti dhe floriri) me vlerë rreth 500 000 euro, u sekuestruan nga Policia në qendër dhe në qarqe, si dhe nga shërbimet e Policisë Kufitare, në disa pika, si rezultat i 17 operacioneve të finalizuara kundër krimeve ekonomiko-financiare.

U zbardhën 43 vjedhje në banesa ose në biznese të ndryshme. Autorët e tyre u identifikuan dhe u vunë në pranga, si dhe u sekuestruan 38 100 euro dhe aksesorë floriri, të vjedhura”, deklaron Policia e Shtetit.

Gjithashtu bën me dije se janë arrestuar 21 shtetas për zjarrvënie si dhe janë nën hetim 31 shtetas dhe 1 person është në kërkim.

“Policia ndërhyri për 52 raste zjarrvëniesh. Përveç asistencës së shërbimeve për të shuar zjarret, hetimet e ndjekura me përparësi rezultuan me arrestimin e 21 shtetasve, procedimin në gjendje të lirë të 31 shtetasve dhe shpalljen në kërkim të 1 tjetri, të gjithë të dyshuar për zjarrëvënie me dashje apo nga pakujdesia”, njofton policia.

Bëhet me dije se janë finalizuar 10 operacione kundër tranportimit të paligjshëm të emigrantëve.

“U finalizuan 10 operacione kundër transportimit të emigrantëve, kundrejt pagesave, për të kaluar ilegalisht kufirin, me destinacion vendet e BE-së”,thotë Policia e Shtetit.4 shtetas të kërkuar ndëkombëtarisht për vrasje, trafikim të drogës, marrëdhënie seksuale me dhunë ose mashtrim, u kapën nga Policia shqiptare, me qëllim ekstradimin”, njofton Policia e Shtetit./ CNA