web counter
LEXO PA REKLAMA!

SHKARKO APP

App Store
Google Play

E fundit!

x

Ndahet nga jeta Kristo Mema, qëndrestari antikomunist, ikona e vuajtjeve të Elbasanit

9 Tetor 2024, 10:00, Aktualitet CNA

Ndahet nga jeta Kristo Mema, qëndrestari antikomunist, ikona e vuajtjeve

Kristo Mema, një nga të përndjekurit politikë të komunizmit është ndarë nga jeta në moshën 89-vjeçare.

Lajmin e ka bërë të ditur Besim Ndregjoni, Presidenti i Unionit Mbarëkombëtar të Integrimit të Burgosurve dhe të Përndjekurve Politikë të Shqipërisë.

Ndregjoni e cilëson Kristo Memën si qëndrestar dhe ikonë të vuajtjeve në Elbasan, ndërsa shprehet se është pinjoll i familjes së madhe të Memave.

Ai tregon se si ish-i përndjekuri politik dhe familja e tij u përplasën me regjimin komunist dhe u torturuan për vite me radhë.

Deklarata e plotë:

U shua një fisnik i Elbasanit, pinjolli i familjes së madhe të Memave, ai që provoi burgun dhe internimin politik Kristo Mema!

Ndahet nga jeta Kristo Mema, qëndrestari antikomunist, ikona e vuajtjeve

Rrjedh nga një familje e pasur e Shtermenit të Elbasanit dhe kjo familje u përplas me komunizmin, qysh në vitin '43. Në gushtin e '43-shit, vëllanë e babait e pushkatojnë partizanët dhe prej asaj kohe u bë shkëputja. Më parë, ishin të përbashkët në luftë, kundër pushtuesve. Në vitin '44, u rreshtuan me forcat e Ballit Kombëtar të Mid'hat Frashërit. I nipi i babait, Jorgji, u emërua si sekretar i përgjithshëm i qarkut të Elbasanit, për Ballin Kombëtar dhe të tjerët me detyra, për të mbrojtur dinjitetin e popullit. Në vitin '44, u shpërngulëm dhe vajtëm në Tiranë sepse Jorgji kërkohej nga komunistët, edhe ne si familje. Në '43-shin, digjen dy shtëpi nga partizanët: shtëpia e Stefanit dhe shtëpia e Trifonit, të dy vëllezërve të babait dhe në '44-ën djegin shtëpinë e tretë, po të vëllait të babait, të Mihal Memës. Kështu që u shpërngulëm. Në nëntor të 1944-ës, vritet Jorgji në Tiranë, nga partizanët. Atëherë, u dorëzuan prindërit tanë, nëpërmjet miqësisë. Tre xhaxhallarët u dorëzuan, dy nipërit ikën, një vëllai i madh, Trifoni, u kap në Kukës dhe me tortura e zhdukën. Pra, u bënë tre: në '43-shin, vëllai i babait, në nëntor '44, Jorgji dhe në dhjetor po të '44-ës, zhduket nga torturat i ati i Jorgjit, vëllai tjetër i babait...Lufta kishte filluar nga '43-shi, por ishte luftë politike, tani nga '45-a, filloi dhe lufta ekonomike. Në '46-ën bëhet Reforma Agrare dhe konfiskohet gjithë pasuria, tokat, pyjet që kishim ne, prona private të luajtshme dhe të paluajtshme.

Kristo Mema ishte një nga figurat më qëndrestare, një nga qëndrestarët e Demokracisë, Kristo Mema. I lindur dhe i rritur në Shtërmen të Elbasanit, duke u përfshirë në lëvizjen demokratike të ndryshimit të sistemit, pas një periudhe të gjatë vuajtjesh në burgjet e diktaturës komuniste, ai u bë një nga figurat qendrore të Shoqatës së të Përndjekurve, dhe po aq dhe një nga mbështetësit aktivë të PD-së në vite. Kristo Mema u dallua për pjekuri e gjakftohtësi, intelekt dhe mendim të pjekur në të gjithë angazhimet e tij. Kristo Mema ishte human dhe patriot. Ishte njeri me sinqeritet e burrëri. I vendosur dhe transparent në mendim. Ai u bë një nga iniciatorët kryesorë për gjetjen e eshtrave të të vrarëve e të pushkatuarve pa varre nga Diktatura Komuniste. Kështu një demokrat i pastër në shpirt, një demokrat i vendosur, ai kurrë nuk gaboi dhe nuk ishte një nga ata që kërkonte hakmarrje, por gjithnjë foli për pajtim, falje dhe gjithëpërfshirje. Në fakt ai gjithnjë ishte në krah të emrave më të ndritur të lëvizjes demokratike shqiptare dhe gjithnjë në ballë të vlerave që synonin liri, integritet dhe lëvizje për ta bërë Shqipërinë si e gjithë Europa. Kristo Mema ishte një nga figurat qendrore që mbështeti në vitet e para të Demokracine në Elbasan, ai rreshtohet krahas patriotëve elbasanas për trimërinë e tij ndaj xhelateve komuniste. Kristo Mema ishte dhe një nga miqtë e ngushtë dhe mbështetësit e të pavdekshmit, Pjetër Arbnori At Zef Pllumit Hafiz Sabri Koçit, Ai ishte mbështetës i Lef Nosit e Visarjon Xhuvanit e shumë ikonave të elitës antikomuniste që vuajtën në kampin e tmerrshëm të Spaçit. Kështu ikja e tij në amshim, është një humbje e madhe për Demokracinë, për familjen, për ne të mbijetuarit e diktaturës, për qytetin e Elbasanit. Qofsh i Parajsës Kristo Mema. Ngushëllime Gjergjit, familjarëve të tij, dhe të gjithë të afërmve dhe miqve. Ngushëllime të gjithë atyre që e kanë njohur nga afër dhe e kanë ndjerë humbjen e ikjes së tij të dhimbshme. I qoftë dheu i lehtë!/ CNA





Lajmet e fundit nga