web counter
LEXO PA REKLAMA!

SHKARKO APP

App Store
Google Play

E fundit!

x

Kushtetuesja do të vendosë për votën e të burgosurve në zgjedhje

20 Maj 2026, 20:53, Aktualitet CNA

Kushtetuesja do të vendosë për votën e të burgosurve

Çështja e votimit të të burgosurve në bashkinë ku ndodhet institucioni i vuajtjes së dënimit do të shqyrtohet nga Gjykata Kushtetuese, pasi Kolegji Zgjedhor pezulloi zbatimin e vendimit të KQZ-së dhe kërkoi interpretim kushtetues të ligjit.

Vendimi i Kolegjit erdhi pas ankimit të bërë nga Partia Demokratike, e cila kundërshtoi aktin e miratuar nga KQZ në prill 2026. Sipas këtij akti, të burgosurit dhe personat që ndodhen në institucione shëndetësore afatgjata do të konsideronin si vendbanim për efekt zgjedhor institucionin ku qëndrojnë.

Kjo do t’u jepte mundësi personave që vuajnë dënimin larg vendbanimit të tyre civil të votonin në bashkinë ku ndodhet burgu. Pikërisht ky përcaktim është kundërshtuar nga opozita, e cila argumenton se burgu nuk mund të trajtohet si vendbanim i përhershëm.

Në vendimin e saj, trupa gjykuese vendosi jo vetëm pezullimin e aktit të KQZ-së, por edhe ndalimin e shqyrtimit të mëtejshëm të çështjes deri në shprehjen e Gjykatës Kushtetuese për nenin 18 të ligjit për gjendjen civile.

Debati mbi votën e të burgosurve u rikthye pas zgjedhjeve lokale të vitit 2023 në Rrogozhinë, ku votat e burgut ndikuan drejtpërdrejt në rezultatin përfundimtar të garës për bashkinë.

Pas atij precedenti, mazhoranca ndryshoi ligjin në vitin 2024 duke përcaktuar se burgjet dhe institucionet e trajtimit afatgjatë konsiderohen vendbanim për efekt zgjedhor.

Tashmë pritet që Gjykata Kushtetuese të japë interpretimin përfundimtar mbi vlefshmërinë e këtij përcaktimi dhe mënyrën se si do të ushtrohet e drejta e votës për personat që ndodhen në institucionet e mbyllura./ CNA





Lajmet e fundit nga