Kryepiskopi i ri i Kishës Ortodokse Shqiptare/ Vijojnë urimet e shumta për Fortlumturinë e Tij, Joanin

19 Mars 2025, 20:56, Aktualitet CNA

Kryepiskopi i ri i Kishës Ortodokse Shqiptare/ Vijojnë urimet e shumta

Urimet për zgjedhjen e Fortlumturisë së Tij Joanit si Kryepiskop i Kishës Ortodokse Shqiptare vijojnë të jenë të shumta.

Patriarku i Antiokisë dhe i gjithë Lindjes, përgëzon Fortlumturinë e Tij dhe lutet për bekime qiellore.

“Me gëzim morëm lajmin e zgjedhjes suaj si Kryepiskop i Tiranës dhe gjithë Shqipërisë. Ju përgëzojmë dhe i lutemi Perëndisë së Plotfuqishëm t'ju dhurojë bekimet e tij qiellore për të shërbyer Kishën që Ai ka shpëtuar”, thuhet në urimin e Patriarkut të Antiokisë dhe të gjithë Lindjes, Fortlumturia e Tij Joan.

Një tjetër urim për Fortlumtuirinë e tij, Joan ka ardhur nga Mitropoliti i Varshavës dhe i Gjithë Polonisë, Sava.

Mitropoliti i Varshavës uron që Perëndia të ndihmojë në shërbimin e tij, Kryepiskop Joanin.

“Në emër të Kishës Orthodhokse të Polonisë si dhe personalisht, ju uroj përzemërsisht për zgjedhjen tuaj si Primat i Kishës Orthodhokse të Shqipërisë.

Uroj që Perëndia t’ju ndihmojë në shërbimin tuaj me përgjegjësi, për të mirën e Orthodhoksisë së shenjtë. Shpresoj që bashkëpunimi i mirë mes Kishave tona, që zhvilluam me Kryepiskopin e ndjerë Anastas, të vazhdojë dhe të përparojë më tej. Vite të shumta, Fortlumturi!

Me dashuri vëllazërore në Krishtin, Sava. Mitropolit i Varshavës dhe i Gjithë Polonisë”, thuhet në urim.

Kryepiskopi i Uashingtonit, Tikhon ka dërguar gjithashtu një urim për Fortlumturinë e Tij, Joanin.

Mitropoliti i gjithë Amerikës dhe Kanadasë uron vite të bekuara si Kryepiskop i gjithë Shqipërisë dhe lutet që marrëdhëniet e mira mes Kishës Orthodhokse Autoqefale të Shqipërisë dhe Kishës Orthodhokse në Amerikë të mbeten të forta.

“Fortlumturi, vëlla dhe bashkëmeshtar në Misteret e Zotit,

Ju shkruaj për t’ju përcjellë urimet e mia për zgjedhjen tuaj si Kryepiskop i Tiranës, Durrësit dhe gjithë Shqipërisë.

Thirrja për shërbesën kryepiskopale është gjithnjë përulëse, jo vetëm për shkak të lartësisë së kësaj detyre, por edhe për barrën e rëndë që ajo mbart. Fakti që paraardhësi juaj, Fortlumturia e Tij, Kryepiskopi i ndjerë Anastas, e kreu shërbesën e tij me kaq besnikëri, zell dhe dashuri, e thekson edhe më shumë madhështinë e detyrës që ju është besuar.

Jam i sigurt, megjithatë, se ndërsa pranoni Fronin Kryepiskopal të Kishës Orthodhokse Autoqefale të Shqipërisë nga dora e vetë Krishtit, mund të mbështeteni gjithnjë në shembullin dhe mësimet e paraardhësit dhe mësuesit tuaj të ndjerë, si dhe në përvojën dhe ndërmjetësimet e të gjithë hierarkëve të shenjtë dhe të gjithë shenjtorëve. Së fundmi, ju siguroj se do të lutem për ju, vëllai im, ndërsa merrni Fronin Kryepiskopal të Tiranës, Durrësit dhe gjithë Shqipërisë.

Lutem për ju dhe që marrëdhëniet e mira mes Kishës Orthodhokse Autoqefale të Shqipërisë dhe Kishës Orthodhokse në Amerikë të mbeten të forta, duke u fuqizuar më tej në vitet që do të vijnë, ndërsa vijojmë të kërkojmë mundësi bashkëpunimi për shpalljen e Ungjillit dhe forcimin e unitetit të Kishës së Shenjtë Orthodhokse.

Edhe një herë, ju lutem pranoni dashurinë time vëllazërore dhe urimet e mia të përzemërta. Zoti ju dhëntë shumë vite të bekuara si Kryepiskop i gjithë Shqipërisë.

Vëllai juaj në Krishtin,

+Tikhon

Kryepiskop i Uashingtonit

Mitropolit i gjithë Amerikës dhe Kanadasë”, thuhet në urim./ CNA