E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

Karakaçi: Po shqyrtojmë rikthimin e akteve të subvencionimit të naftës

1 Prill 2026, 13:50, Aktualitet CNA

Ministri i Infrastrukturës dhe Energjisë, Enea Karakaçi, ka folur për mediat pas mbledhjes së sotme të qeverisë. Karakaçi njoftoi se ka zhvilluar një takim me shoqatat e transportit mbi situatën e krizës së hidrokarbureve dhe çmimeve.

Ai tha se do të merret në konsideratë rikthimi i akteve të subvencionimit të naftës, ndërsa shtoi se do të shqyrtohen dhe propozimet e tjera të shoqatave.

“Jo më larg se para rreth dy orësh bashkë me ministren e Ekonomisë dhe Bashkinë e Tiranës ishin në takim me Shoqatat e Transportit. Situata e krizës dhe çmimeve është duke u ndjekur me kujdes. Qeveria ka njoftuar disa plane masash, si ngritja e Bordit të Transparencës dhe akcizën. E dimë që gjatë 2022 janë marrë disa akte subvencioni sa u përket shoqatave, ky element po diskutohet përsëri. Por jemi duke e marrë në konsideratë bashkë me propozime të tjera të bëra nga shoqatat e transportit”, u shpreh ai.

Karakaci njoftoi po ashtu se në mbledhjen e sotme janë miratuar disa rregulla për etiketimin e produkteve me ndikim në energji.

“Akti kryesor ku dua të ndalem është për rregullat e etiketimit të produkteve me ndikim në energji. Deri tani kemi pasur rregullim të fragmentuar. Flasim për pajisje elektrike që kanë etiketimin sipas normave të BE-së. Kemi 17 rregulla sa u përket këtyre elementëve. Së pari, ofrojmë për herë të parë te konsumatori një qasje të integruar të të gjitha ndikimeve në energji të produkteve dhe ai mund të bëjë blerjen me informacion të plotë të çdo produkti. Së dyti, ulim konsumin e energjisë elektrike. Së fundmi është një detyrim në kuadër të BE-së dhe ndër masat që ministria i ka të parashikuara te plani i rritjes. Ky hyn si akt në këtë plan masash të BE-së. Akti është shumë i detajuar, ka 17 rregulla dhe gjithë listën e produkteve”, tha Karakaçi.

Ministri është pyetur nga gazetarët edhe lidhur me heqjen e taksës së qarkullimit nga çmimi i naftës, ku theksoi vlerësimin e qeverisë se paguan më shumë ai që harxhon më shumë.

“Ka një keqkuptim sa i përket taksës së qarkullimit. Çdo shtet e ka, por mnënyra si vilet kjo taksë është e ndryshme. Vlerësimi i qeverisë shqiptare është që vjelja e taksës së qarkullimit nga konsumi i litrave të naftës është më proporcional sepse paguan më shumë ai që harxhon më shumë. Sa i përket reduktimit të barrës fiskale të karburantit janë marrë dy vendime: ngritja e Bordit të Transparencës për caktimin e çmimit tavan dhe pavarësisht diskutimeve nuk kam dëgjuar që ky bord ka marrë vendim në dëm të qytetarëve. Sa u përket implikimeve fiskale, qeveria ka mbajtur qëndrimin se implikimet fiskale nuk duhen prekur sidomos në kohën e krizës”, u shpreh Karakaçi. /CNA