web counter
LEXO PA REKLAMA!

SHKARKO APP

App Store
Google Play

E fundit!

x

Kampionati botëror i degustimit “të verbër” të verës/ Shqipëria, për herë të parë me një ekip

10 Tetor 2024, 09:01, Aktualitet CNA

Kampionati botëror i degustimit “të verbër” të

Shqisa të mprehta, shumë studim e “stërvitje me shijen” duket se janë armët e vetme që do të kenë me vete pesë përfaqësues të ekipit shqiptar në Kampionatin Botëror të Degustimit Verës, ku vendi ynë merr pjesë zyrtarisht për herë të parë.

Kjo do të jetë përballja e parë e kantinave shqiptare në një terren tërësisht të ri për to, që synon ta identifikojë qartë Shqipërinë si një destinacion të prodhimit të verës dhe pse jo të nxisë turizmin që lidhet me të. Ky kampionat është në edicionin e tij të 12-të dhe do të mbahet më 12 tetor në Château Dauzac në Margaux, aftër Bordosë në Francë.

Në bazë të këtij aktiviteti "blind testing" (apo degustrim "i verbër") që nënkupton se pjesëmarrësit do të provojnë verëra të ndryshme, për të cilat nuk do të kenë asnjë informacion paraprak dhe në bazë të shijes dhe elementeve të tjera të vlerësimit do të japë vlerësimin për varietetin e rrushit, rajonin, shtetin, treguesit e detajuar gjeografikë dhe vitin e prodhimit (kur është vjelë rrushi apo prodhuar vera).

Kampionati botëror i degustimit “të verbër” të

Ekipi shqiptar do të ketë si pjesëtarë të tij trajnerin Chris Gurali, Admir Pupën (testues dhe përfaqësues i kantinës "Pupa"), Flori Uka (testues, enolog, përfaqësues i kantinës "Uka"), Serxhio Prelashi (lideri i ekipit, testues, enolog, somelier, themelues i verërave Parcelare SSP), Rigers Kaçorri (testues, enolog, përfaqësues i kantinës "Arbëri").

“World Tasting Championship është kompeticioni më i madh botëror i verërave. 40 shtete përfaqësohen në kompeticion me nga 5 degustuesit dhe njohësit më të mirë të verërave të vendit të tyre! Thuajse të gjitha shtetet pjesëmarrëse kanë një konkurs kombëtar për të zgjedhur 5 njohësit më të mirë.

Për shembull, Kina teston 300.000 somelierë në vit për të zgjedhur 5 më të mirët për t’u përfaqësuar në këtë kompeticion”, tha për “Monitor” lideri i ekipit shqiptar z.Prelashi.

Pjesëmarrja në një garë si kjo vlerësohet, sipas tij, si një mundësi e jashtëzakonshme për vende si Shqipëria ku prodhimi i verës dhe kantinat cilësore janë rritur vit pas viti, por ende nuk kemi një njohje ndërkombëtare si një destinacion i kësaj fushe. Shqipëria ka një potencial të jashtëzakonshëm për segmentin e turizmit të verës, që është një turizëm, i cili tërheq pas vetes miliona turistë anekënd globit në kërkim të etiketave të veçanta.

Kampionati botëror i degustimit “të verbër” të

Flori Uka, nga kantina Uka tregon se propozimi fillestar erdhi nga Serxhio Prelashi i cili jeton në Francë prej vitesh, ku është i angazhuar në sektorin e verës.

“Dëshira e tij për të promovuar sa më shumë verërat shqiptare dhe Shqipërinë si një hartë apo destinacion i rëndësishëm i verës ndërkombëtare, bëri të mundur krijimin e skuadrës sonë. Mendoj që është një ndër pikat më të larta të karrierës sime personale si somelier. Gjithashtu kjo jep një impakt të mirë edhe për kantinën tonë që është baza ku unë jam formuar profesionalisht”, thotë ai.

Rigers Kaçori nga kantina "Arbëri" në vend shprehet se pjesëmarrja në këtë garë sjell përfitim përtej personales sa i takon markës që ai përfaqëson.

“Pjesëmarrja në këtë event është një privilegj për mua dhe kantinën pasi po njihemi kudo nëpër botë. Është promovim i dyfishtë personal dhe profesional dhe uroj që si pjesë e ekipit të Shqipërisë të arrijmë pse jo rezultate ambicioze. Kjo do t’i jepte një zë të madh Shqipërisë, e cila duhet të fillojë të njihet në arenën botërore edhe nga prodhimi cilësor i pijes verës”, shprehet ai.

Në të njëjtën linjë duket se është edhe Admir Pupa nga kantina "Pupa", i cili shprehet se përzgjedhja për të qenë pjesë e ekipit shqiptar në këtë garë ndërkombëtare është vlerësim për kantinën që ka në bazën e saj prodhimin e verës me rrushin autokton të Beratit, disa varietete mjaft të vjetra që e bëjnë të veçantë verën./ Monitor.al





Lajmet e fundit nga