I organizuan atentat/ Kush është Mitri Prifti, që tentoi të ekzekutonte Edison Begajn

28 Maj 2024, 14:18, Aktualitet CNA

I organizuan atentat/ Kush është Mitri Prifti, që tentoi të

Genti Nderjaku (alias Kili, alias Ekil Nderjaku), nuk ka qenë i përfshirë vetëm në atentatin ndaj ish-prokurorit Arjan Ndoja, ngjarje e ndodhur në nëntor të 2019-ës, ku mbeti i vrarë shoferi, Andi Maloku.

Nga hetimet e SPAK-ut ka rezultuar se Genti Nderjaku, në bashkëpunim me persona të tjerë, ka siguruar kushtet dhe mjetet materiale për të kryer vrasjen e shtetasit Mitri Prifti. Ky i fundit, me profesion jurist.

Plani për vrasjen e Mitrit është bërë në periudhën shtator 2020-janar 2021.

"Po kështu i pandehuri Genti Nderjaku (alias Kili, alias Ekil Nderjaku), në bashkëpunim me persona të tjerë ende të paidentifikuar gjatë harkut kohor 04.09.2020 – 30.01.2021, ka siguruar kushtet dhe mjetet materiale për të kryer vrasjen e shtetasit Mitri Prifti, duke konsumuar në këtë mënyrë elementët e veprave penale të parashikuara nga nenet 80, 28/4, 333/a/1 dhe 334/1 i Kodit Penal", thuhet në njoftimin e SPAK-ut.

Kush është Mitri Prifti?

Mitri Prifti u identifikua si autori i dyshuar i atentatit ndaj Edison Begajt, ngjarje e ndodhur në 29 maj 2021 në Kaninë.

Ndaj Mitrit u ngrit akuza për veprat penale “Vrasja me paramendim”, mbetur në tentativë dhe “Armëmbajtja pa leje”.

Autoritetet njoftuan se shkak i kësaj ngjarjeje ishte një përplasje që Mitri Prifti ka pasur me Edison Begajn në zonën e Lungomares në Vlorë.

Kujtojmë që Prifti ka qenë dëshmitar në gjyqin ndaj Emiljano Shullazit në vitin 2017.

Dëshmitari, me origjinë nga Kuçova, u pyet në Gjykatë në cilësinë e kushëririt të parë të Jani Zakës, biznesmenit të cilit iu vendos një sasi lënde eksplozive në garazhin e tij te “21 Dhjetori”.

Në sallën e gjyqit, Mitri u shpreh se kushëriri i tij, biznesmeni Jani Zaka, i kishte thënë që kishte pasur probleme pronësie me familjen Sinani. Kjo deklaratë e dëshmitarit u kundërshtua nga ana e Prokurorisë.

Organi i akuzës tha se Mitri Prifti kishte pohuar në janar 2016, kur edhe ishte marrë në pyetje nga oficeri i Policisë Gjyqësore, se kishte biseduar me kushëririn e tij, Jani Zakën, dhe ai i kishte thënë se ka marrë kërcënime edhe nga Emiljano Shullazi./CNA