"Grinçi i ri i shqiptarëve"/ Erion Dasho: Rilindja sajoi nga hiçi "aferën" e klubit Partizani

28 Dhjetor 2023, 09:05, Aktualitet CNA

Erion Dasho

Eksperti i Shëndetit Publik, Erion Dasho, ka reaguar këtë herë për masën e sigurisë të vendosur nga GJKKO për Sali Berishën.

Sipas tij, "afera" e klubit Partizani është e sajuar, ku në të nuk mungonë akuzat e stisura.

"Ligjësia se historia përsëritet nuk mund të ishte më ulëritëse se kaq; komunistët e rinj arritën sërish t'u vidhnin shqiptarëve Krishtlindjen dhe tani gjithçka mbetet në dorën e qytetarëve. A do ta ulin kokën edhe njëherë duke e lejuar Grinçin e ri t'u vjedhë gëzimin, festat dhe të ardhmen e fëmijëve?! A do ta përkulin kurrizin përpara diktaturës së re që po rivendoset?", shprehet Dasho.

Reagim i plotë:

GRINÇI I RI I SHQIPTARËVE
Në sajë të përrallës së famshme dhe të inskenimeve të shumta, të rrallë janë ata që nuk kanë dëgjuar për Grinçin, personazhin mizantrop që trishtohej kur të tjerët gëzonin dhe që u përpoq të shkatërronte festën e Krishtlindjeve.
Ndërkohë që Grinçi është një personazh alegorik, imagjinar dhe, në fund të fundit, zbavitës, shqiptarët kanë patur fatkeqësinë të kishin Grinçin e tyre të vërtetë dhe të tmerrshëm.
Në Krishtlindjen e vitit 1946, babai shpirtëror i Boratit të sotëm arrestonte antarët e grupit të deputetëve, duke i privuar shqiptarët nga e vetmja opozitë që u kishte mbetur dhe duke eliminuar pengesën e fundit në rrugën drejt diktaturës së plotë.
Në vitet që pasuan, komunistë vodhën edhe 44 Krishtlindje të tjera dhe u deshën dekada që shqiptarët të rifitonin të drejtën për t'u gëzuar si gjithë bota.
***
Këtë vit, duke sajuar nga hiçi "aferën" e klubit Partizani dhe duke luajtur me afatet dhe vendimmarrjen juridike, rilindja arriti të vendosë në skenë epilogun e skenarit të vet anti-opozitë pikërisht në ato që duhet të ishin ditë të gëzueshme feste.
Borati u shndërrua në Grinç dhe u vodhi sërish Krishtlindjet shqiptarëve. Për ditë e javë me radhë nuk u fol edhe ende nuk flitet për festa, pemë krishtlindjesh, dhurata dhe gëzim, por për akuza të stisura, prokurorë, gjykatës, arrestime, dhunë politike dhe protesta.
Ligjësia se historia përsëritet nuk mund të ishte më ulëritëse se kaq; komunistët e rinj arritën sërish t'u vidhnin shqiptarëve Krishtlindjen dhe tani gjithçka mbetet në dorën e qytetarëve.
A do ta ulin kokën edhe njëherë duke e lejuar Grinçin e ri t'u vjedhë gëzimin, festat dhe të ardhmen e fëmijëve?!
A do ta përkulin kurrizin përpara diktaturës së re që po rivendoset?

Masat ndaj Berishës

Gjykata e Posaçme do të shpallë ditën e sotme, e enjte, 28 dhjetor 2023, vendimin për ish-kryeministrin Sali Berisha.

Kjo gjykatë do të vendosë nëse do të pranojë kërkesën e Prokurorisë së Posaçme për caktimin e masës së sigurisë “arrest shtëpie” për Berishën.

Më datë 21 dhjetor Kuvendi votoi me 75 vota pro për heqjen e imunitetit të Sali Berishës. Heqja e imunitetit i hapi rrugë kërkesës së SPAK-ut për arrestimin e tij.

Berisha akuzohet se ka kryer veprime konkrete, si kryeministër, me miratime ligjesh dhe aktesh nënligjore, nga të cilat përfitoi dhëndri i tij, përmes privatizimit të pronës shtetërore- kompleksi sportiv Partizani./CNA