Çështja CEZ-DIA/ Klodiana Lala zbulon detaje: Të njohurve të Metës u janë sekuestruar celularët

17 Nëntor 2023, 08:00, Aktualitet CNA

Çështja CEZ-DIA/ Klodiana Lala zbulon detaje: Të njohurve

Gazetarja Klodiana Lala ka zbuluar detaje nga hetimet e çështjes CEZ-DIA.

E ftuar në emisionin "Të Paeskpozuarit" me Ylli Rakipin, gazetarja ka deklaruar se kjo çështje është drejt fundit për shkak të mbarimit të afateve pasi dosja është në Prokurori prej 3 vitesh.

Gjithashtu gazetarja Klodiana Lala është shprehur se ka informacion se njerëzve të njohur të kreut të Partisë së Lirisë, Ilir Meta, dhe bashkëpunëtores më të ngushtë të Monika Kryemadhit u janë sekuestruar celularët nga ana e Prokurorisë së Posaçme dhe janë duke u parë të gjitha lëvizjet e tyre në sistemin TIMS, për shkak se ajo ka pasur udhëtime të shpeshta drejt Britanisë së Madhe.

“Çështja CEZ-DIA është nisur prej 15 vitesh. Është pushuar nga prokuroria e Tiranës, është rikthyer nga gjykata e Tiranës për së dyti, ka pasur një komision hetimor dhe u mbyll vetëm me dënimin e Kastriot Ismailajt, që kishte një kompani dhe ishte kontraktuar nga çekët e CEZ për mbledhjen e borxheve. Rezultoi se kjo kompani nuk pati rezultat dhe sot e ka përfunduar dënimin.

Gjatë vitit 2020 pas një padie të juristit Romeo Kara, Prokuroria e Posaçme e hapi hetimin për z. Meta, ministrin e asaj kohe, që nuk është marrë direkt me procedurat, por është tamam si në rastin e z. Ahmetaj. Ka pasur një dëshmi të ish-drejtorit të CEZ, që thotë se Kastriot Ismailajn ma ka sjellë dhe sugjeruar z. Ilir Meta. Ndërkohë që ka një dëshmi të Elvis Matës. SPAK tashmë nuk po merret vetëm me çështjen e firmave. SPAK është duke parë marrëdhënien mes z. Meta dhe z. Ismailaj, ka pasur udhëtime, ka pasur përfitime financiare, transferta të ndërsjella.

Unë kam informacion se njerëzve të njohur të Ilir Metës u janë sekuestruar celularët. Njërës nga bashkëpunëtoret më të ngushta të zonjës Kryemadhi i është sekuestruar celulari nga ana e Prokurorisë së Posaçme dhe janë duke u parë të gjitha lëvizjet e saj në sistemin TIMS, për shkak se zonja ka pasur udhëtime të shpeshta drejt Britanisë së Madhe.

Z. Meta është pyetur dy herë dhe e dyta pasi kanë ardhur letër-porositë, qëndrimi që ka pasur Meta në Pragë. Është sekuestruar edhe dosja e z. Ismailaj dhe pak para se të lirohej është marrë një dëshmi e tij e gjatë.

Mendoj se kjo çështje do të marrë fund së shpejti për shkak të afateve, se kanë kaluar 3 vite nga dosja në prokurori. Aty ka dyshime për korrupsion dhe pastrim parash”, - tha Lala./ CNA