Ekskluzive/ Ja kur fillon lëvizja në rrugën Librazhd-Përrenjas

2 Mars 2026, 14:41, Aktualitet CNA

Aksi rrugor i shumëpërfolur Librazhd-Përrenjas, i cili ka izoluar juglindjen e vendit duke dhënë dhe kosto të mëdha ekonomike, financiare, dhe duke ndarë juglindjen e vendit nga pjesa tjetër e Shqipërisë nëpërmjet rrugëve alternative që janë një sfilitje dhe torturë për udhëtarët, pritet të hapet ditën e nesërme.

CNA ka mësuar nga burime zyrtare pranë ARRSH-së se, nesër afër mesditës do të bëhet lejimi i mjeteve të vogla për të kaluar në segmentin Librazhd-Përrenjas, pikërisht aty ku ka rënë, në Dragostunjë.

Sipas të njëjtave burime zyrtare për CNA, theksohet se nga nesër lëvizja do të fillojë në një trase te pjesa e rrugës së re që po ndërtohej, pra një segment emergjent i cili do të funksionojë për dy apo tri javë deri në ndërtimin e një traseje tjetër, asaj që do kalojë te shinat e trenit poshtë buzëlumit.

Me ndërtimin e trasesë së re, e cila ka një gjatësi rreth 1.2 deri 1.3 kilometra, lëvizja e mjeteve do të fillojë të bëhet në pjesën e poshtme. Kjo për të lejuar që më pas të fillojnë punimet masive për ndërtimin e trasesë rrugës në këtë segment të Korridorit VIII, për të cilin po bëhet një studim i ri.

Sipas të dhënave zyrtare të siguruara nga CNA, te segmenti në Dragostunjë ku rruga ka rrëshqitur, ekspertët pasi kanë diskutuar dhe kanë mundur të kenë kampionët e studimeve gjeologjike, kanë rënë në dakordësi se atje duhet të ndërtohet një viadukt me ura, të cilat do të bënin të mundur zgjidhjen përfundimtare të problematikës së kalimit në këtë segment të Korridorit VIII.

CNA ka mësuar gjithashtu se pas vendimit për t'u bërë me ura, do të pritet projekti për të mësuar dhe kohën që do të duhet për të ndërtuar këtë segment në Dragostunjë të Korridorit VIII, i cili tashmë ka filluar, për të cilin tashmë ka filluar një investim i madh nga Rrogozhina drejt Elbasanit, Librazhdit, Përrenjasit, për të ecur më pas me një rrugë me katër korsi drejt Maqedonisë së Veriut.

E gjithë situata është parashikuar që të zgjidhet sipas të dhënave zyrtare me këto faza:

Faza e parë: Fillimi i rrugës nesër në datën 3 mars afër mesditës te segmenti ku ishin rrëshqitjet, me një kalim te pjesa e re e rrugës që po ndërtohet, e cila është punuar këto ditë 24 orë.

Kjo do të jetë provizore për dy-tri javë ose maksimumi një muaj për ndërtimin e një bypass-i poshtë ku ndodhet traseja e shinave të trenit, që do të shërbejë edhe kjo për periudhën e tretë.

Ndërtimin e plotë të këtij segmenti, që sipas ekspertëve, inxhinierëve dhe ARRSH-së, do të bëhet me viadukt, pra me ura, për të zgjidhur njëherë e mirë dhe përfundimisht, për të mos pasur probleme në këtë segment të Korridorit VIII./ CNA