web counter
LEXO PA REKLAMA!

SHKARKO APP

App Store
Google Play

E fundit!

x

Edicioni i 19-të i Festës së Birrës në Korçë/ Themeli: Risi këtë vit në organizim, suksesi i radhës i qytetit

13 Gusht 2025, 15:42, Aktualitet CNA

Edicioni i 19-të i Festës së Birrës në

Korça do të hapë mbrëmjen e sotme siparin e edicionit të 19-të të ‘Festës së Birrës’, ngjarja që prej vitesh ka fituar statusin e eventit më të madh veror në Shqipëri. Për pesë net me radhë, qyteti juglindor do të jetë destinacioni kryesor i turistëve vendas dhe të huaj.

Sipas nënkryetares së bashkisë, Benila Themeli, ky është një sukses i radhës jo vetëm për institucionin dhe organizatorët, por për të gjithë qytetin, i cili për këto ditë jeton në ritmin e muzikës, festës dhe turizmit.

“Edicioni i 19-të i Festës së Birrës është suksesi i radhës, jo vetëm për bashkinë dhe agjencinë implementuese të eventit, por i qytetit të Korçës që kthehet në pesë ditë në destinacionin e preferuar të verës. Në verën e nxehtë të këtij viti, hotelet e Korçës janë të prenotuara nga shumë vizitorë vendas e të huaj, që do të thotë se bashkia me ideologjinë që nisi 19 vite më parë këtë event, ia ka dalë në këtë rrugë të konsoliduar që është zhvillimi i turizmit, bazuar në krejt potencialin e mrekullueshëm që Korça ka”,-tha Themeli.

Në këtë edicion, risia është pjesëmarrja e tetë kompanive të birrës nga vendi dhe rajoni, si dhe tri kompanive të nënprodukteve të mishit, të shoqëruara nga dhjetëra mbështetës e partnerë të tjerë. Për herë të parë, festa ofron Wi-Fi falas për të gjithë pjesëmarrësit dhe hyrje pa pagesë, duke e bërë edhe më të aksesueshme për publikun e gjerë.

“Risia e këtij viti është se ka një numër shumë të madh të birrave pjesëmarrëse. Janë 8 kompani pjesëmarrëse këtë vit, 3 kompani të nënprodukteve të mishit dhe shumë mbështetës të tjerë të eventit, të cilët i janë bashkuar bashkisë në këtë event që ka marrë trajtën e festës më të madhe verore në Shqipëri. Do të kemi disa surpriza, përveç këngëtarëve të ftuar të huaj dhe programit me emrat më të mirë të muzikës shqiptare. Do të kemi për herë të parë WiFi falas për të gjithë pjesëmarrësit në Festën e Birrës, do të kemi hyrje pa biletë për të gjithë”,-tha Themeli.

Atmosfera festive nuk kufizohet vetëm në sheshin ku mbahet koncerti kryesor. Pazari i Vjetër është shndërruar në një tjetër skenë të gjallë, ku organizohen koncerte çdo natë, ndërsa baret, lokalet dhe klubet e Korçës kanë programe të veçanta për të gjitha netët e festivalit. Vizitorët që zgjedhin të kalojnë këto ditë në Korçë do të gjejnë jo vetëm muzikë nga artistë të njohur shqiptarë dhe të huaj, por edhe një gamë të gjerë aktivitetesh që e bëjnë qytetin plot jetë dhe energji.

“Ajo që më gëzon është që biznese të tjera në qytet kanë organizime të lidhura me Festën e Birrës, që nga Pazari i Vjetër që bashkia dhe organizatorët kanë instaluar një skenë, e do të kemi koncerte në çdo natë. Edhe në lokale, bare dhe vende ku zhvillohet jeta e natës në Korçë, kanë dedikuar programe të veçanta për të pesta netët e Festës së Birrës. Nëse vjen në Korçë në këto ditë e në fundjavë, ke çfarë të bësh, jo vetëm për kënaqësinë që festa do të ofrojë, por edhe për aktivitetet dhe atmosferën”,-tha Themeli.

Festa e Birrës në Korçë nuk është vetëm një event argëtues, por edhe një motor i rëndësishëm për zhvillimin e turizmit dhe ekonomisë lokale. Me një ofertë të pasur kulturore, gastronomike dhe muzikore, ky edicion i 19-të pritet të thyejë rekordet e vizitorëve, duke e konfirmuar edhe një herë Korçën si kryeqendrën e verës shqiptare./CNA

 

 

 

 

 

 

 

 





Lajmet e fundit nga