"Dritan Prençi me dy standarde", Fundo: Nuk merr nën akuzë Veliajn për inceneratorin, por merr Ballukun për disa sms

11 Nëntor 2025, 21:29, Aktualitet CNA

"Dritan Prençi me dy standarde", Fundo: Nuk merr nën

Gazetari Elvi Fundo është shprehur mbrëmjen e sotme se parimet dhe standardet e SPAK ndryshuan nën drejtimin e kryeprokurorit, Altin Dumani.

I ftuar në emisionin A Show me Adi Krastën, Fundo u shpreh nga ana tjetër se në SPAK ka po ashtu prokurorë, të cilët siç ka thënë dhe vetë Dumani, “flirtojnë”me politikën.

Një ndër to përmendi prokurorin Dritan Prençi, për të cilin u shpreh se është me dy standarde për shkak se nuk po ngre akuzë ndaj kryebashkiakut Erion Veliaj për Inceneratorin e Tiranës, por ka ngritur akuzë ndaj zëvendëskryeministres Belinda Balluku për disa mesazhe të vartësve të saj.

“Unë nuk po them kam qenë mbrojtës i SPAK por i parimeve dhe standardeve që u vunë atje me vajtjen dhe drejtimin e kryeprokurorit Altin Dumani. Shumë dosje hetimore filluan të ecin, filluam të kishim raporte dhe veprime konkrete. Por ka disa prokurorë, siç e ka thënë vetë zoti Dumani në nje dalje në Shkodër, të cilët “flirtojnë” me politikën. Siç është rasti i Sterilizimit apo hetimi ndaj zotit Ilir Beqaj, që më pas ishte gjykata që i kthente çështjet e prokurorëve për rishikim. Në lidhje me zotin Prençi, u bë një kohë e gjatë që kam heshtur se nuk doja të ndikoja te çështje e Inceneratorëve. Me firmën e tij janë marrë dhe sekuestruar shumë dokumenta në zyrën time dhe dosja e inceneratorit të Tiranës është arsyeja. Sepse u vonua hetimi. E dyta, persona të tjerë të përfshirë në dosje, përfshirë kryebashkiakun Erion Veliaj nuk merren në akuzë. Ndërkohë që ai është me letra dhe dokumenta, që minimalisht ka shpërdorim të detyrës. Ndërkohë që ai ka dalë publikisht dhe ka shkuar vetë të inceneratori që nuk ekziston duhet theksuar . Më pas për disa sms është marrë zëvendëkryeministrja në akuzë. Por zëvendëskryeministrja është marrë për sms e vartësit për një investim gjeostrategjik.

Le të qëndrojmë të inceneratori, si ka mundësi gjithë ato dokumenta nuk ka një akuzë. Ndërkohë që në kompjuterin e zonjës Xoxa janë gjetur dokumenta në lidhje me kompani që lidhen me inceneratorin e Tiranës. Dhe zoti Prençi, me sa kam dije nuk i ka marrë materialet. Nuk mund të jesh me dy standarde. Ti nuk mund të jesh kamikaz i zotit veliaj dhe nuk e merr në akuzë dhe pastaj merr zëvendëkryeministren për disa sms. Ai i ka dokumentat dhe fle mbi dokumenta. Dhe ikin qindra miliona euro dhe ja ku jemi me inceneratorët. ”, është shprehur Fundo.

Gazetari tha më tej se Prençi, ndryshe nga prokurorët Ols Dado dhe Altin Dumani, nuk po sulmohet nga mediat e pushtetit. Ai shtoi më tej se prokurori Prençi ka pasur dosjen e inceneratorit të Fierit dhe e ka falur kryebashkiakun dhe ka bërë të njëjtën gjë edhe me Veliajn .

“Prençi nuk po sulmohet nga mediat e pushtetit. Ju kujtohet çfarë iu bë Ols Dados dhe Altin Dumanit? Dritan Prençi ka pasur dosjen e inceneratorit të Fierit por e ka falur kryetarin e bashkisë së Fierit, edhe Erion Veliajn e ka falur, i vonoi hetimet për inceneratorin e Tiranës.

Ols Dado dhe Altin Dumani u “kryqëzuan” edhe nga Sali Berisha edhe nga qeveria edhe nga opozita. Por këtë sikur e kanë xhan, edhe mediat e pushtetit edhe pak opozita. Këtu ka diçka që nuk shkon edhe me standardet që duhet të ketë politika dhe drejtësia”, tha gazetari. /CNA