Dhuna ndaj së miturës në Fier/ Jepen masat e sigurisë për tri të rejat

11 Korrik 2026, 11:45, Aktualitet CNA

Dhuna ndaj së miturës në Fier/ Jepen masat e sigurisë

Prokuroria e Fierit ka vendosur masat e sigurisë për tri vajzat e përfshira në dhunimin ndaj një të miture, ngjarje e cila u bë publike përmes rrjeteve sociale. Personat nën hetim dyshohen për veprën penale të heqjes së paligjshme të lirisë, kryer në bashkëpunim.

Gjykata ka caktuar masën e arrestit me burg për shtetasen L.L., arrest në shtëpi për shtetasen K.G., dhe shtrim të përkohshëm në një institucion psikiatrik për shtetasen M.R.

Sipas Prokurorisë, provat e mbledhura deri në këtë fazë të hetimit kanë diktuar nevojën për këto masa ndaluese, pasi dyshohet se të miturat kanë ushtruar dhunë duke privuar lirinë e një bashkëmoshatareje.

Prokuroria e Fierit u ka bërë thirrje qytetarëve, administratorëve të rrjeteve sociale dhe subjekteve mediatike që të shmangin kategorikisht publikimin ose shpërndarjen e pamjeve dhe të dhënave që identifikojnë të miturat.

Njoftimi i plotë:

Dhuna mes të miturave e bërë publike në rrjetet sociale, me kërkesë të Prokurorisë Fier jepen masat e sigurisë ‘Arrest në burg’, ‘Arrest në shtëpi’ dhe ‘Shtrim në spitalin psikiatrik’

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Fier dhe vendim të gjykatës, u caktuan masat e sigurimit personal ‘Arrest me burg’ për shtetasen L.L., ‘Arrest në shtëpi’ për shtetasen e mitur K.G., dhe ‘Shtrim i përkohshëm në një institucion psikiatrik’ për shtetasen e mitur në konflikt me ligjin M.R. të gjitha të dyshuara për kryerjen e veprës penale ‘Heqja e paligjshme e lirisë’ e parashikuar nga neni 110 i Kodit Penal, kryer në bashkëpunim.

Në vijim të hetimeve, lidhur me procedimin penal nr. 1094, të vitit 2026, i cili ka në objekt hetimin e ngjarjes së dhunës së ushtruar ndaj një të miture, e bërë publike nëpërmjet rrjeteve sociale, deri në këto momente të hetimit, identifikimit të personave të përfshirë në ngjarje dhe veprimeve të kryera prej tyre, janë evidentuar fakte të cilat kanë ngritur dyshimin e arsyeshëm për ekzistencën e veprës penale “Heqja e paligjshme e lirisë”, parashikuar nga neni 110 i Kodit Penal, kryer në bashkëpunim. Faktet e evidentuara deri në këtë fazë të hetimit kanë diktuar nevojën për marrjen e masave të sigurimit personal ndaj personave nën hetim.

Duke qenë se në këtë procedim janë të përfshirë persona të mitur, Prokuroria u bën thirrje qytetarëve, administratorëve të faqeve në rrjetet sociale dhe subjekteve mediatike që të shmangin publikimin, shpërndarjen dhe ripublikimin e pamjeve filmike apo të të dhënave që mund të çojnë në identifikimin e të miturve të përfshirë në këtë ngjarje, duke respektuar detyrimet ligjore për mbrojtjen e privatësisë, dinjitetit dhe të drejtave të tyre.

Prokuroria pranë Gjykatës së Shkallës së Parë të Juridiksionit të Përgjithahëm, Fier, do të vijojë të informojë opinionin publik për çdo zhvillim të mëtejshëm të procedimit penal, në masën që një informim i tillë nuk cenon sekretin hetimor, të drejtat e të miturve dhe garancitë procedurale të parashikuara nga ligji. /CNA