Dhoksologjia e Flamurit/ Kryepiskopi Joan: Largimi masiv nuk ndodh nëse jemi kujdestarë të mirë të vendit

28 Nëntor 2025, 10:36, Aktualitet CNA

Kryepiskopi Joan, në shërbesën për Dhoksologjinë e Flamurit në Katedralen “Ngjallja e Krishtit”, dha mesazhe të rëndësishme për të gjithë shqiptarët.

Fortlumturia e Tij, Joani, shpjegoi se përsëritja e lutjeve në kishë nuk është rastësi, por një mësim i kishës që shumë gjëra duhet t’i përkujtojmë vazhdimisht, për të mos i harruar.

Ai nënvizoi përgjegjësinë e çdo qytetari për të bërë vendin më të mirë për të jetuar, duke e lulëzuar dhe bekuar atë.

“Atdhetari i vërtetë është ai që kontribuon për lulëzimin e vendit të tij, jo ai që shan të tjerët”, shtoi ai.

Ndër të tjera, Kryepiskopi Joan tha se largimi masiv nga vendi nuk do të ndodhë nëse ne do të jemi kujdestarë të mirë të vendit tonë.

Në përmbyllje, Kryepiskopi Joan uroi të gjithë besimtarët dhe shqiptarët:

“Perëndia ta bekojë vendin tonë, popullin tonë dhe të përhapë paqe jo vetëm këtu, por në të gjithë botën. Gëzuar dhe për shumë vjet kjo ditë e bekuar!”

Fjala e plotë e Kryepiskopit Joan

Në kishë ne themi vazhdimisht dhe përsëri me paqe le t’i lutemi Zotit.

Pse i përsërisim vazhdimisht? I përsërisim se mund t’i harrojmë dhe kisha në urtësinë e saj na ka mësuar që shumë gjëra duhet t’i përsërisim.

Sot ne bëjmë një Dhoksologji të Flamurit.

Përse kisha ka vendosur shërbesa të tilla? Për dy arsye shumë të rëndësishme. E para për të falënderuar Perëndinë dhe e përsërisim vazhdimisht që kemi shumë arsye për ta falënderuar që na ka dhënë një vend të bukur që ka gjithçka dhe ne jemi në këtë pjesë të globit si kujdestarët të kësaj pasurie. “I Zotit është dheu dhe gjithçka që ndodhet në të”, thotë Psalmisti, që do të thotë se pronar i gjithë dheut është Zoti, që do të thotë që jemi kujdestarët dhe përgjegjësia jonë është që të jemi kujdestarë të mirë, të mundohemi ta lulëzojmë dhe bekojmë këtë vend.

Nëse do ta bëjmë një vend të mirë ku njerëzit mund të jetojnë në paqe dhe harmoni padyshim që nuk do të largohen shumë njerëz. Gjithmonë për këtë arsye që disa njerëz mund të largohen.

Por një largim masiv nuk do të ndodhë nëse ne do të jemi kujdestarë të mirë të këtij vendi që na ka besuar Perëndia.

E falënderojmë Perëndinë për çdo gjë që na ka dhënë, por na ka dhënë dhe përgjegjësinë për këtë gjë.

Përgjegjësia është e të gjithëve. Gjithkush në vendin ku punon mundohet që ta bekojë dhe lulëzojë këtë vend dhe siç them vazhdimisht që atdhetari i vërtetë është ai njeri që lulëzon vendin e tij, jo ai njeri që shan të tjerët.

Mjafton që ne të bëjmë detyrën për të lulëzuar vendin tonë, kemi bërë detyrën tonë para kishës, para kombit dhe para Perëndisë.

Në këtë ditë do të dojë t'ju uroja të gjithë juve gëzuar dhe për shumë vjet këtë ditë të bekuar.

Perëndia ta bekojë vendin tonë, popullin tonë e të përhapë paqe jo vetëm vendin tonë, por në të gjithë botën, me uratat e Atit tonë të shenjtë Jesu Krishtin Perëndi mëshirona dhe shpëtona. Gëzuar të gjithë për shumë vjet!/ CNA