Denoncimi/ Fluturimi i fundit drejt Hagës, pse qeveria nuk publikon shpenzimet për udhëtimet e Ramës

12 Korrik 2025, 11:23, Aktualitet CNA

Denoncimi/ Fluturimi i fundit drejt Hagës, pse qeveria nuk publikon

Zëdhënësja e Antikorrupsionit në PD, Genta Vangjeli, në një deklaratë për mediat, ka bërë një denoncim lidhur me udhëtimet e Ramës, duke evdidentuar atë për në Hagë.

Sipas Vangjelit, Rama ka udhëtuar disa ditë më parë drejt Holandës për të marrë pjesë në samitin e NATO-s, duke zbritur në aeroportin Schiphol në Hagë me një avion charter të markës Gulfstream G IVSP VIP, me numër regjistrimi TC-EMR (sipas pamjeve të publikuara nga mediat).

Vangjeli thotë se ky avion nuk është në pronësi të shtetit shqiptar dhe dyshohet të jetë marrë me qira me një kosto që varion nga 6,500 deri në 7,500 dollarë për orë fluturimi, duke përfshirë karburantin, ekuipazhin, shërbimin VIP dhe udhëtimin privat. Avioni “TC EMR” është i njohur ndërkombëtarisht për fluturimet luksoze dhe përdoret nga klientë të nivelit të lartë.

Më tej thekson se në 30 janar 2020 Drejtoria e Shërbimeve Qeveritare ka lidhur një marrëveshje bashkëpunimi me Air Albania me objekt ofrimin e shërbimit të fluturimeve të posaçme charter për KM e RSH.

Sipas pikës 3.1.6 të kësaj aktmarrëveshjej,e Air Albania do të vendosë në dispozicion të DSHQ mjetin

Avion Air craft Airbus A319

Kapacitet mbartës 32 persona

Kodi i regjistrimit TC-ANA

Vitet e përdorimit 20

Vangjeli nënvizon se pagesat variojnë sipas destinacionit dhe sipas pikës pikës 3.2.4, DSHQ merr përsipër pagimin e faturës tatimore lëshuar nga Air Albania.

Sipas mediave, e pyetur nga BIRN, Agjencia për Media dhe Informim deklaroi se: “Kryeministria nuk ka paguar ndonjëherë dhe nuk paguan për charter-a, por ka një marrëveshje kuadër me kompaninë Air Albania, në një shumë vjetore mesatare të shpenzimeve vjetore të kryeministrit në vitet paraardhëse”.

Vangjeli shton se qytetarët shqiptarë meritojnë përgjigje të qarta lidhur me:

- A është zbatuar pika 3.2.6 e aktmarrëveshjes së lidhur ndërmjet Air Albania dhe DSHQ, duke qenë se avioni me të cilin KM fluturoi në Hagë është i ndryshëm nga ai i përcaktuar në aktmarrëveshje, dhe nëse po, kërkojmë të publikohet dakordësimi me shkrim i Air Albania-s.

-Sa është vlera e fluturimit të udhëtimit të KM në Hagë sipas faturës tatimore respektive lëshuar nga ofruesi i shërbimit?

-Sa është çmimi i paguar deri tani nga DSHQ për udhëtimet charter të KM?

-Duke qenë se në thesar nuk gjejmë fatura të ekzekutuara sipas nominimit të aktmarrëveshjes dt. 30 janar 2020, si është procedurar me pagesat në favor të ofruesit të shërbimit Air Albania, i cili sipas databazës së spending data nga thesari që prej v.2019 deri tani, rezulton të ketë përfituar vetëm 200 mijë lekë për udhëtime./ CNA