web counter
LEXO PA REKLAMA!

SHKARKO APP

App Store
Google Play

E fundit!

x

Aida Gjeçaj, pronarja e restorantit që u shkrumbua: PËR TË VËRTETËN, THETHIN DHE MUNDIN TIM

11 Korrik 2025, 14:25, Aktualitet CNA

Aida Gjeçaj, pronarja e restorantit që u shkrumbua: PËR TË

Pronarja e restorantit të djegur në Theth, Aida Gjeçaj, në një deklaratë publike, ka reaguar në lidhje me sulmet nga mediat, të cilat e kanë lidhur me aksionin e shembjes së ndërtimeve pa leje në Theth.

Gjeçaj është shprehur se po hidhet baltë mbi emrin e saj, pasi ajo ka ngritur zërin për hallet, mungesën e energjisë elektrike, plehrat apo rrugën e keqe.  

Ajo thekson se ka qenë gjithmonë për zhvillimin e qëndrueshëm, për ndërtimin me standard dhe për ruajtjen e identitetit arkitektonik e kulturor të Thethit – që ai të bëhet një Trentino i Shqipërisë, një destinacion model në Ballkan.

“Emisioni i datës 8 mars 2024, ku është përmendur emri im në mënyrë të pasaktë, ishte një podkast kushtuar grave në biznes. Aty nuk është përmendur asnjë fjalë për ndërtime në Theth. Është minimumi profesional që një analist ta dëgjojë emisionin për të cilin flet, përpara se të shpërndajë hamendësime”, ka theksuar ajo.

DEKLARATË PUBLIKE – PËR TË VËRTETËN, THETHIN DHE MUNDIN TIM

Një dorë e ligë vendosi të më godasë aty ku më dhemb më shumë – duke djegur restorantin tim në zemër të Thethit. Aty ku unë dhe familja ime kemi ndërtuar me vite sakrifice një hapësirë mikpritjeje, një vatër nderi për traditën, natyrën dhe turizmin shqiptar.

Në të njëjtën kohë, disa zëra në media, të nxituar ose të painformuar, kanë zgjedhur të hedhin baltë mbi emrin tim, duke më lidhur padrejtësisht me aksionin e shembjes së ndërtimeve pa leje në Theth. Dua të jem shumë e qartë:

Unë kurrë nuk kam kërkuar shembjen e askujt.

E di sa e vështirë është të ndërtosh në këto male, e di çfarë do të thotë të ngresh një çati me mundin dhe djersën e familjes.

Unë kam lobuar e ngritur zërin në media gjithmonë për hallet si mungesa e energjisë elektrike, plehrat apo rruga e keqe.

Unë kam qenë gjithmonë për zhvillimin e qëndrueshëm, për ndërtimin me standard dhe për ruajtjen e identitetit arkitektonik e kulturor të Thethit – që ai të bëhet një Trentino i Shqipërisë, një destinacion model në Ballkan.

Emisioni i datës 8 mars 2024, ku është përmendur emri im në mënyrë të pasaktë, ishte një podkast kushtuar grave në biznes. Aty nuk është përmendur asnjë fjalë për ndërtime në Theth. Është minimumi profesional që një analist ta dëgjojë emisionin për të cilin flet, përpara se të shpërndajë hamendësime.

Kam dhënë qindra intervista për mediat shqiptare ndër vite. Kam folur për mikpritjen, për zhvillimin, për turizmin, për femrën që ndërton në një fshat malor. Por kurrë nuk kam kërkuar të shembet mundi i tjetrit. Kam luftuar që të mos shkatërrohet ai i imi.

Falënderim nga zemra

Në këtë moment të vështirë, dua të falënderoj nga zemra të gjithë ata që më kanë qëndruar pranë – familjarë, miq, fqinj, turistë dhe bashkëpunëtorë që më kanë shkruar, më kanë telefonuar, më kanë dhënë kurajë dhe fjalë ngushëllimi. E keni bërë dhimbjen më të lehtë për ta përballuar.

Zjarri i dikujt tjetër nuk do të më ndalë. Përkundrazi – do të rindërtoj më bukur, më fort dhe më me dashuri, sepse Thethi nuk do njerëz që ndajnë, por duar që ndërtojnë bashkë./ CNA





Lajmet e fundit nga