"Cila Europë të merr me 100 euro pension?"/ Korreshi: Këtu dy analiza të njëjta, t'i nxjerrin me rezultat ndryshe

4 Qershor 2026, 18:41, Aktualitet CNA

Deputeti Saimir Korreshi ka mbajtur fjalën e tij në seancën e sotme plenare, ku ka akuzuar qeverinë për braktisjen e qytetarëve, ndërkohë që flet për anëtarësim në Bashkimin Europian.

Korreshi u shpreh se sot pensionistët me aq para sa marrin shtyjnë muajin me shumë vështirësi. Po ashtu foli edhe për ndihmën ekonomike, vlerë me të cilën sipas tij nuk jetohet.

“Njerëzit e thjeshtë rebelohen nga arroganca juaj. Zvërneci ishte pika që derdhi gotën e kësaj babëzie. Flisni për pensionet po a i keni pyetur ndonjëherë pensionistët se si e shtyjnë muajin. A ka shkuar ndonjë prej jush të shkojnë të pyesin të Posta sa lek marrin pensionistët? Ju që thoni jemi një hap larg Europës. Cila Europë të merr me 100 euro pension. Nuk paguan dot biletën e avionit se ngel në avion pa zbrit. A e dini ju që njerëzit thonë ishalla nuk më thirrin në dasëm se nuk kam lekë të hedh. Disa njerëz e mbajnë frymën gjallë nga ata të afërm që kanë jashtë se nuk sigurojnë dot bukën. A e dini sa lekë ndihmë ekonomike ndani në muaj për njeri? 27 mijë lekë të vjetra nuk mban dot frymën gjallë”, u shpreh Korreshi.

Deputeti demokrat shprehu kritika edhe për sistemin shëndetësor, ndërsa tha se dy analiza të njëjta gjaku dalin me rezultate të ndryshme.

“Në spitalin e Lushnjes mungon tetanozi, duhet ta blesh vetë jashte dhe pastaj të shkosh ta bësh në spital. Ky shtet bëri dy palë analiza, te njëra thuhej që ishte me leucemi, te tjera ishin vlera normale. Po e tregoj rastin tim konkret. Më erdhi analiza pasi dhurova gjak, ske rruaza të bardha kanë mbaru, dil kërkoj borxh. Alarmohem ca ndodhi. Shkoj bëj analizat prap më dalin në rregull. Prandaj ftoj të gjithë lushnjarët ditën e dielë, pa parti, të vijnë të protestojnë që ju që keni marrë votën në Lushnje, ti ktheni spital, medikamente, shërbim dhe pastaj të flisni për Europë”, u shpreh deputeti.

Ndër të tjera foli për vrasjen e efektivit të policisë në Lozhan të Korçës ku tha se sot është dita më e dëshpëruar për Policinë e Shtetit.

“Fodullëku juaj i coi ata sot atje pa antiplumb. Sot jemi në ditën më të dëshpëruar për Policinë e Shtetit. Se ministri juaj e ka vendin për parkimet dyshe dhe si e si të vërë njërin apo tjetrin palë drejtor policie”, shtoi Korreshi. /CNA