web counter
LEXO PA REKLAMA!

SHKARKO APP

App Store
Google Play

E fundit!

x

Bllokohet miniera e bakrit në Spaç/ 70 punonjës në protestë, duam kushte dhe paga më të larta

13 Tetor 2025, 12:53, Aktualitet CNA

Rreth 70 minatorë të minierës së bakrit në Spaç të Mirditës kanë ndalur punën dhe kanë bllokuar hyrjen kryesore të objektit, në shenjë proteste ndaj kushteve të vështira të punës dhe nivelit të ulët të pagave.

“Është një e drejtë e punëtorëve, minatori është baza e çdo punëdhënësi. Kërkojmë të marrim atë çfarë takon dhe të mos gjunjëzojemi para një pronari”, tha një minator.

 

"Jam punonjësi më i vjetri këtu. Na kanë zhgënjyer me rroga me çdo gjë, ne kërkojmë drejtësi brenda ligjit. Punoj nën tokë dhe e kam pagën 3 mijë lekë të rinj në ditë, janë kushtet e vështira”, u shpreh një tjetër minator.

Minatorët thanë se ndihen të rrezikuar sa herë hyjnë nën tokë dhe nuk kanë garanci nëse do të dalin më.

 

“Bëjmë kryq sa herë hyjmë nën tokë, kaq pasiguri ka. Nuk e dimë nëse do të dalim. Po na bëjmë të marrim rrobat e të ikim nga vendi ynë”, tha minatori.

 

Ata deklaruan se po kërkojnë të drejtat e tyre edhe nuk do ta ndalojnë protestën pa iu siguruar të drejtat.

 

"Jam një nga minatorët e Spaçit. Nuk kërkojmë luks vetëm të drejtat tona. Pa u ulur për bisedime ne nuk e ndërpresim protestën sepse jemi në trojet tona, jetën na e ka falur zoti e jo pronari. Do të qëndrojmë deri në grevë urie”, u shpreh një minatori.

 

Sipas vetë punonjësve kërkesat e tyre, përfshijnë përmirësimin e kushteve të sigurisë në minierë dhe rritjen e pagave mujore.

Punonjësit nuk kanë lejuar hyrjen e përfaqësuesve të firmës në ambientet e minierës. Kjo është e disata herë që punonjësit kërkojnë përmirësim të kushteve të punës dhe rishikim të pagave.

Këto të fundit disa herë të premtuara se do të rriten nga ana e firmës, por deri më tani asgjë konkrete./CNA





Lajmet e fundit nga