Kryegjyshi Botëror boton librat "Shtrirja e Bektashizmit në Shqipëri – Vëllimi I dhe II": Thirrje për reflektim shpirtëror

15 Nëntor 2025, 18:58, Aktualitet CNA

Kryegjyshi Botëror boton librat "Shtrirja e Bektashizmit në

Kryegjyshi Botëror i Bektashinjve, Haxhi Dede Edmond Brahimaj, ka botuar librat “Shtrirja e Bektashizmit në Shqipëri -Vëllimi I dhe II”. Këto dy botime që hedhin dritë mbi historinë, shtrirjen dhe rolin shpirtëror të Bektashizmit në trojet shqiptare u prezantuan nga Kryegjyshata Botërore Bektashiane, në kuadër të Panairit të Librit 2025.

Të pranishëm në këtë aktivitet prezantues të dy botimeve ishin ishin drejtues të “Panairi i Librit-2025”, përfaqësues institucionesh shtetërore e fetare, studiues, miq të dijes dhe dashamirës të kulturës bektashiane. Këto dy vëllime përfaqësojnë një vepër të thellë kërkimore dhe shpirtërore, të realizuar me qëllimin për të dokumentuar historikun e teqeve, tyrbeve, personaliteteve dhe rrugëtimit shekullor të Bektashizmit në hapësirën shqiptare.

Në aktivitet mbajti fjalën vetë Baba Mondi, ku u shpreh se rëndësia dhe thelbi i këtyre botimeve është se, në çdo vend ku është ngritur dhe ngrihet një teqe, aty ngrihet një vatër drite e paqeje. Kryegjyshi Botëror i Bektashinjve tha gjithashtu se këto libra janë jo vetëm dëshmi historike, por edhe thirrje për reflektim shpirtëror.

“Të nderuar përfaqësues të institucioneve fetare e shtetërore, të dashur studiues, besimtarë, miq e dashamirës të dijes. Me paqe dhe dashuri ju përshëndes në këtë ditë të bekuar, ku fjala e shkruar na bashkon në emër të dijes, shpirtit dhe trashëgimisë sonë të përbashkët.

Është një kënaqësi e veçantë që sot, në këtë Panair të Librit, paraqesim dy vepra të rëndësishme për historinë dhe identitetin tonë shpirtëror: “Shtrirja e Bektashizmit në Shqipëri – Vëllimi I dhe II”.

Këto dy vëllime janë frut i një pune kërkimore, shpirtërore dhe historike, që synon të pasqyrojë me përkushtim udhën e shtrirjes së Bektashizmit në trojet shqiptare. Ato sjellin dritë mbi rolin e teqeve, tyrbeve dhe figurave të shquara bektashiane në ruajtjen e besimit, kulturës, identitetit kombëtar dhe në përhapjen e vlerave të dashurisë, tolerancës dhe bashkëjetesës.

Rëndësia e thelbi i këtyre botimeve është se, në çdo vend ku është ngritur dhe ngrihet një teqe, aty ngrihet një vatër drite e paqeje.

Bektashizmi ka qenë dhe mbetet një urë shpirtërore që lidh njerëzit me Zotin dhe me njëri-tjetrin, nëpërmjet udhës së shenjtë të njeriut të mirë, të drejtë dhe të ndershëm. Në çdo kohë, mësimet e bektashinjve kanë ndriçuar zemrat e njerëzve me devotshmëri, paqe dhe vëllazëri universale.

Këto libra janë jo vetëm dëshmi historike, por edhe thirrje për reflektim shpirtëror. Përmes faqeve të tyre, lexuesi udhëton nëpër qindra vite përvoje, përkushtimi dhe shërbimi ndaj Zotit dhe kombit, duke parë se si Bektashizmi ka qenë pjesë e gjallë e jetës shqiptare në çdo cep të këtij vendi që prej shekullit XIII–XIV.

Në këtë Panair, dua të falënderoj të gjithë ata që kanë ndihmuar në realizimin e këtyre veprave: studiuesit, bashkëpunëtorët, botuesit dhe të gjithë miqtë që ndajnë me ne të njëjtin mision – të ruajmë dhe të përcjellim vlerat shpirtërore e njerëzore që na bashkojnë.

Le të jenë këto botime një udhërrëfyes për brezat e sotëm e të ardhshëm, një dëshmi e gjallë se feja, dija dhe dashuria janë tri shtylla që mbajnë lart njeriun dhe kombin. Në frymën e Zotit, në paqe e dashuri, ju përgëzoj dhe ju uroj lexim të frytshëm! Paçim dritë, paqe e dashuri në çdo zemër!”, u shpreh Kryegjyshi Botëror i Bektashinjve. /CNA