Arrestimi i nipit të Astrit Avdylajt/ Dalin pamjet e operacionit

14 Tetor 2025, 10:00, Aktualitet CNA

Arrestimi i nipit të Astrit Avdylajt/ Dalin pamjet e operacionit

Pamje nga operacioni policor

Policia e Shtetit ka dalë me reagim zyrtar lidhur me arrestimin e nipit të Astrit Avdylajt. Në njoftimin e mëposhtëm, 37-vjeçari Elidon alias Aldo Avdylaj, cilësohet person me rrezikshmëri të lartë shoqërore.

Arrestimi i tij u bë nga Forcat Operacionale të Policisë së Durrësit në bashkëpunim me Forcat Speciale të “RENEA”-s, në banesën e tij në afërsi të Liqenit të Thatë. Gjatë ndërhyrjes në banesë u gjet dhe sekuestrua një armë zjarri pistoletë me municion luftarak.

37-vjeçari akuzohet nga GjKKO-ja për veprat penale "Vrasja me paramendim", kryer për hakmarrje, "Pastrimi i produkteve të veprës penale ose veprimtarisë kriminale", të kryera në kuadër të grupit të strukturuar kriminal, si dhe “Mbajtja pa leje dhe prodhimi i armëve, armëve shpërthyese dhe i municionit”.

Njoftimi i policisë:

Policia e Shtetit

Finalizohet operacioni policor i koduar “Ghosts”.

Operacioni u zhvillua nga DVP Durrës, në bashkëpunim me Drejtorinë e Forcës së Posaçme Operacionale në DPPSh dhe Forcat Speciale “RENEA”.

Lokalizohet, kapet dhe vihet në pranga një shtetas me rrezikshmëri të lartë shoqërore.

Në pranga 37-vjeçari nga Shijaku, i akuzuar si pjesëtar i një grupi kriminal për krime kundër personit.

Gjatë ndërhyrjes në banesën ku fshihej 37-vjeçari, Policia gjeti dhe sekuestroi një armë zjarri pistoletë me municion luftarak.

Në vijim të punës për lokalizimin, kapjen dhe ndalimin e personave të shpallur në kërkim, strukturat operacionale të Policisë, bazuar në informacionet e siguruara në rrugë operative, për një shtetas në kërkim, me rrezikshmëri të lartë shoqërore, organizuan dhe finalizuan operacionin policor të koduar “Ghosts”.

Në kuadër të operacionit, Forcat Operacionale të DVP Durrës, në bashkëpunim me DFPO dhe Forcat Speciale “RENEA”, në afërsi të Liqenit të Thatë, kapën dhe vunë në pranga shtetasin E. A. alias A. A., 37 vjeç, banues në Shijak.

Ky shtetas akuzohet nga GjKKO-ja, për veprat penale "Vrasja me paramendim", kryer për hakmarrje, "Pastrimi i produkteve të veprës penale ose veprimtarisë kriminale", të kryera në kuadër të grupit të strukturuar kriminal, si dhe “Mbajtja pa leje dhe prodhimi i armëve, armëve shpërthyese dhe i municionit”.

Materialet procedurale iu referuan SPAK-ut, për veprime të mëtejshme.