E fundit!

10:08 Aktualitet

“Bashkitë në fazë të re zhvillimi”/ Demo: Duhet projekte cilësore për të përthithur fondet e BE

Ministri i Shtetit për Pushtetin Vendor, Ervin Demo, dekla...

Akuzat për punësimet/ Blendi Gonxhja paralajmëron padi ndaj Çim Pekës: Të sfidoj ta vërtetosh!

24 Dhjetor 2023, 11:51, Aktualitet CNA

Akuzat për punësimet/ Blendi Gonxhja paralajmëron padi ndaj

Çim Peka dhe Blendi Gonxhja

Kreu i Drejtorisë së Përgjithshme të Shërbimit të Transportit Rrugor, Blendi Gonxhja, ka reaguar ndaj Çim Pekës, për një deklaratë të këtij të fundit në lidhje me punësimet në këtë institucion.

Sipas Gonxhjës, deklarata e Pekës se në "Drejtorinë e Targave dhe Patentave në Kashar qenkan punësuar të paktën 100 veta të sistemit të drejtësisë për qokë", është një lajm i pavërtetë.

Gonxhja thekson se është krenar që nuk ka favorizuar ndonjë skemë kapjeje institucionesh të pavarura me vende të reja pune dhe nuk ka kryer as "spastrime" punonjësish.

Ai paralajmëron padi ndaj Pekës, nëse ky i fundit nuk korrigjon deklaratën e thënë.

"Të hapur për çdo verifikim, i kërkojmë Z. Peka ose të faktojë akuzën, ose të korrigjojë vetveten! Në të kundërt na lind e drejta t’i drejtohemi rrugës ligjore për vënien në vend të reputacionit të DPSHTRR", shprehet ai.

Reagimi i plotë:

FAKE NEWS? Hedhim poshtë me neveri akuzën e moderatorit Çim Peka, në një panel në SYRI TV, se në DRSHTRR Tiranë (siç e cilëson ai: Drejtoria e Targave dhe Patentave në Kashar) qenkan punësuar, të paktën 100 veta, njerëz të sistemit të ri të drejtësisë (!!!!!)! Sfidojmë Z. Peka të vijë vetë të na provojë dhe të vërtetojë akuzën e tij! Është e turpshme të hidhet baltë mbi një ent model, sa i takon respektimit të Kodit të Punës, ku për periudhën që lidhet me marrjen e detyrës nga ana ime, dhe që sipas Z. Peka përkon me ngritjen e sistemit të ri drejtësisë, të cilit sipas Z. Peka i paskemi bërë mbi 100 qoka punësimi, evidentojmë me krenari se as nuk kemi favorizuar ndonjë skemë kapjeje institucionesh të pavarura me vende të reja pune dhe as nuk kemi ushtruar spastrime, fshesa politike, partiake apo diskriminuese!

Ftoj Z. Peka të mësojë mbi batërdinë e paraardhësve të mi, kur kjo drejtori thyente rekorde spastrimesh për t’u bërë hambar për militantë të PD e LSI, duke përzënë në vetëm 4 vite (2014-2017) mbi 700 punonjës, dhe duke i sjellë entit (DPSHTRR-së) një faturë detyrimesh gjyqësore për dëmshpërblimin, prej 118,278,777 Lekë të reja (ose rreth 1.15 milionë Euro me kursin e sotëm)! Ndryshe nga ky model i shëmtuar, gjatë drejtimit tim (nga dt. 22.11.2018 e në vijim, pra për mbi 5 vjet) janë vetëm 24 largime nga puna të kontestuara, ende në proces gjykimi!

Në DPSHTRR punojnë sot edhe të afërm, bashkëshortë, familjarë të personazheve me zë anti-qeveri dhe të deputetëve ose ish-deputetëve të opozitës, apo kandidatësh për deputetë a kryetarë bashkish të PD/LSI, etj, si një normalitet për standardet tona dhe respektin ndaj ligjit, të gjithë dëshmitarë të frymës korrekte, profesionale dhe plotësisht të denjë, si dita me natën e krahasuar me epokën e drejtorisë famëkeqe të targave e patentave, kur drejtohej nga ata që sot përfaqësojnë opozitën! Të hapur për çdo verifikim, i kërkojmë Z. Peka ose të faktojë akuzën, ose të korrigjojë vetveten! Në tê kundërt na lind e drejta t’i drejtohemi rrugës ligjore për vënien në vend të reputacionit të DPSHTRR!/CNA