Aksion për hapësirat publike në Pogradec/ Prishen 20 objekte të ngritura pa leje

22 Shtator 2025, 12:47, Aktualitet CNA

Aksion për hapësirat publike në Pogradec/ Prishen 20 objekte

Në qytetin e Pogradecit ka nisur një aksion i gjerë për lirimin e hapësirave publike, i cili po zbatohet nga Agjencia e Mbrojtjes së Territorit si pjesë e planit të përgjithshëm të qeverisë, që synon t'u rikthejë qytetarëve hapësirat që prej vitesh janë zaptuar në mënyrë të paligjshme. Ndërhyrja ka nisur në zonën e Kalasë, ku janë prishur rreth 20 objekte të ngritura pa leje.

Aktualisht aksioni është zhvendosur në rrugën e spitalit, ku inspektorët po vijojnë punën për lirimin e ambienteve të pushtuara. Për dhjetëra ndërtime të tjera janë bërë njoftimet përkatëse dhe pronarëve u është lënë një afat pesëditor që të largojnë vetë objektet. Megjithatë, duke qenë se kjo nuk ka ndodhur, ndërhyrja është realizuar nga forcat e AMT-së.

“Sipas planit të kryeministrit, kemi marrë një aksion në të gjithë qytetin, konkretisht kemi qenë në zonën Kala. Tani kemi mbaruar në zonën Kala dhe momentalisht jemi në rruga e spitalit. Kemi prishur rreth 20 objekte në Kala, ndërsa janë rreth 30 objekte që kanë bërë njoftimet përkatëse sipas ligjit. Kemi bërë njoftimet që brenda 5 ditëve duhet t'i lironin vetë, nuk i kanë liruar dhe jemi detyruar të veprojmë me mjetet tona”,-tha Markel Hafesllari, drejtor i Agjencisë së Mbrojtjes së Territorit.

Nga ana tjetër, drejtuesi i AMT-së bëri të qartë se deri më tani nuk është hasur në kundërshtime nga qytetarët, çka ka lehtësuar vijimin e punës. Ai u bëri apel atyre që kanë marrë njoftimet, të tregojnë bashkëpunim dhe të lirojnë vetë hapësirat për të shmangur veprimet e detyruara.

“Jo, nuk ka pasur kundërshtime. Për këtë arsye është ky aksion që të gjitha hapësirat publike t'u takojnë të gjithë banorëve, jo vetem një banori që mund të rrethojë zonën dhe mund ta ketë pronën e vet në një kohë që është pronë publike për të gjithë banorët e qytetit. Aksioni do të jetë në të gjithë qytetin. Kujt i ka shkuar njoftimi, ju lutemi të bëjnë lirimin e hapësirave vetë që të mos ndërhyjmë ne”,-tha Hafesllari.

Ky aksion, që pritet të shtrihet në çdo lagje të Pogradecit, shihet si një hap i rëndësishëm drejt rikthimit të rregullit dhe garantimit të aksesit të barabartë për të gjithë banorët në hapësirat publike të qytetit./CNA