E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

7-Marsi/ Këshilli i Qarkut Shkodër pret mësuesit në pension

7 Mars 2026, 16:00, Aktualitet CNA

Në kuadër të Festës së Mësuesit, 7 Marsit, Këshilli i Qarkut Shkodër organizoi një pritje të veçantë për disa nga mësuesit që kanë dalë në pension, por që ndër vite kanë dhënë një kontribut të çmuar në edukimin dhe formimin e brezave. Gjatë këtij takimi u shpreh mirënjohja e thellë për punën dhe përkushtimin e tyre shumëvjeçar në arsim.

"Jeni shtyllat e shoqërisë sonë. Jeni kuptimi i fjalës dije. Kam kënaqësinë të jem me ju në këtë takim sepse jeni shembulli dhe motivi i punës sonë të përditshme. U uroj 7 Marsin të gjithë mësuesve të Qarkut Shkodër", u shpreh Edmond Ndou, kryetari i Këshillit të Qarkut Shkodër.

Mes emocioneve dhe falënderimeve, arsimtarët veteranë shprehën një mesazh për të gjithë brezin e ri të mësuesve: dashuri, durim dhe përkushtim ndaj profesionit të shenjtë të edukimit.

"Keni në dorë kombin, fatet e kombit. Se si është arsimi sot do të jetë edhe ardheu nesër. Kudo që shkuam, transmetuam dijen, kënaqësinë dhe dashurinë", u shpreh Muhamet Shala, ish-mësues.

“’Ne marrim kënaqësinë edhe nga ish-nxënësit që takojmë, është vlerësim i madh’; ‘Metodat bashkëkohore duhet të përhapen dhe të futen në formë të gjerë në të gjitha mjediset ku ka shkolla’; ‘Jam përpjekur që të punoj me profesionalizëm, me dashuri për nxënësit dhe besoj se kemi arritur diçka’; ‘Festat janë ora e ndërgjegjes dhe njeriu e çon mendjen tek brengat e veta, tek kujtimet e veta, tek sukseset dhe ajo orë është një bonifikim i shpirtit të njeriut’; ’Faleminderit shumë për këtë takim. Përpara se të japim fizikë, letërsi, matematikë etj., ne mësuesit kemi dhënë patriotizëm’", shprehen arsimtarët.

Në shenjë falënderimi dhe mirënjohjeje, mësuesve iu dhuruan buqeta me lule, botime kushtuar arsimit dhe pamje të veçanta të qytetit, si një kujtim i veçantë për përkushtimin e tyre dhe për rolin e rëndësishëm që luajnë në jetën e komunitetit. /CNA