web counter
LEXO PA REKLAMA!

SHKARKO APP

App Store
Google Play

E fundit!

x

"Lufta" për karrigen e Metës/ "Dash Shehi kandidat model"

22 Maj 2022, 17:08, Politikë CNA

Teksa palët politike kanë djegur dy raunde për zgjedhjen e Presidentit, pasi nuk kanë dorëzuar në Kuvend asnjë emër, Fatmir Mediu dhe Agron Duka kanë shprehur publikisht kandidaturën e tyre.

Në një intervistë për CNA.al, kreu i PAA ka renditur disa nga arsyet se përse Dashamir Shehi është një kandidaturë e denjë për t'u bërë President.

Duka tha se deri më tani për Shehin nuk rëndon asnjë provë korrupsioni, ndërsa e cilëson këtë të fundit si njeri të ndershëm, me personalitet, integritet njerëzor dhe profesional.

"Emri i Zotit Shehi është njëri prej atyre që ne kemi diskutuar. Përse ky emër? Ne jemi përpjekur të gjejmë emra apo figura publike dhe politike, që nuk plotësojnë thjeshtë kriteret kushtetuese, por që plotësojnë ca kritere të tjera që nuk janë të shkruara në asnjë ligj, dhe që janë kriteret njerëzore. Siç janë ndershmëria, personaliteti, integriteti njerëzor dhe profesional etj.

Tani unë mund të bëjë një kundër pyetje: Përse jo Z.Shehi? Ka një jetë në politikë, ka qenë në funksione të larta drejtuese, dhe unë dua t’i pyes të tërë publikisht tani: Kush ka një provë korrupsioni që rëndon mbi këtë njeri? Problemi më i madh që ne kemi sot është pikërisht korrupsioni, janë politikanët e vjetër që janë majmur me paratë e taksave të qytetarëve dhe të rinjtë që ecin në gjurmët e tyre, dhe nxitojnë edhe ata të pasurohen si modelet e tyre politike.

A na duhet një njeri i ndershëm sot neve? Pa asnjë dyshim, madje mendoj se njeriu për të cilin kemi nevojë sot është pikërisht ai, njeriu i pakorruptuar dhe që të mbështese drejtësinë të luftojë korrupsionin. Dhe unë nuk di njeri që të ketë dhënë prova më shumë se zoti Shehi që ka patur pushtet në dorë dhe nuk është përfshirë në korrupsion. Nëse nuk duam nje njeri si model të antikorrupsionit, atëherë ja tek e keni parlamentin, zgjasni dorën dhe kapni një, këtë doni, e bëjeni president, dhe pastaj akuzojeni dhe shajeni deri sa të vijë radha të zgjedhim tjetrin", u shpreh ai për CNA.al

Më tej, kreu i PAA-së deklaroi se kandidatura e Shehit mund të mos marrë mbështetjen e socialistëve, por theksoi se për të do të ishte një President model.

“Tani vota është e fshehtë dhe mbi të gjitha ajo nuk është një vullnet i lirë i deputetëve. Në parlament votohet mbi bazën e urdhërave, apo vendimeve politike, të marra në parti. Ne e dimë se një kandidat i yni mund të mos e marrë mbështetjen e mazhorancës socialiste, por ne duam që tu tregojmë atyre se ndërsa 'enden' duke kërkuar një kandidat model, ja ku është një model. Një President i denjë kundër korrupsionit. Një President që të mbështesë drejtësinë, dhe jo të endet dyerve të drejtësisë që të mbyllë dosjet e tij. Një President, që të mos caktojë se kë duhet të arrestojë drejtësia, por realisht një njeri i ndershëm deri në palcë dhe pa asnjë ngarkesë emicionale politike, për asnjërën palë", nënvizoi Duka./ CNA.al





Lajmet e fundit nga